mere afkar badle jo wahi ustad ho mera

mire afkār badle jo vahī ustād ho merā

mahārat ho jise fan par vahī naqqād ho merā

mire ash'ār āfāqī mirī ġhazleñ hoñ paiġhāmī

ho merī fikr sanjīda qalam āzād ho merā

rahe qaa.em namī hoñToñ kī terā naam lene se

tire hī zikr se banjar ye dil ābād ho merā

mire par noch kar donoñ dar-e-zindāñ hī vā kar de

ki itnā mehrbāñ mujh par kabhī sayyād ho merā

sazā-e-‘ishq de mujh ko sar-e-bāzār laTkā kar

baḌā be-rahm patthar-dil koī jallād ho merā

dilāsa koī jhūTā duuñ batāo kyā ye mumkin hai

maiñ sab kuchh bhuul jā.ūñ aur use sab yaad ho merā

'mubārak' vajd meñ aa.e mukarrar kī sadāoñ se

ilāhī pur-asar aisā koī irshād ho merā

mere afkar badle jo wahi ustad ho mera

mahaarat ho jise fan par wahi naqqad ho mera

mere ash'ar aafaqi meri ghazlen hon paighami

ho meri fikr sanjida qalam aazad ho mera

rahe qaem nami honTon ki tera nam lene se

tere hi zikr se banjar ye dil aabaad ho mera

mere par noch kar donon dar-e-zindan hi wa kar de

ki itna mehrban mujh par kabhi sayyaad ho mera

saza-e-‘ishq de mujh ko sar-e-bazar laTka kar

baDa be-rahm patthar-dil koi jallad ho mera

dilasa koi jhuTa dun batao kya ye mumkin hai

main sab kuchh bhul jaun aur use sab yaad ho mera

'mubarak' wajd mein aae mukarrar ki sadaon se

ilahi pur-asar aisa koi irshad ho mera