kaun hai jis ne yahan apni koi tadbir ki

kaun hai jis ne yahāñ apnī koī tadbīr kī

naql karte aa rahe haiñ ab talak sab miir kī

ban ga.ī vo sar-varaq merī kitāb-e-zāt kā

aap ne jo ik nazar is jism par tahrīr kī

hāzirī dene ko ġham har roz jaate haiñ vahāñ

dil bhī goyā qabr ho jaise kisī dil-gīr kī

ham ne bhī zindān se aise nibhā.ī hai vafā

kaaT dī hai 'umr kaḌiyāñ chūmte zanjīr kī

naaz se itrā rahī hai vo tumhāre saath par

yā'nī mujh se achchhī qismat hai mirī tasvīr kī

raat bhar ik phuul ko chūmā hai maiñ ne ḳhvāb meñ

sub.h māthā chuum kar us ḳhvāb kī tā'bīr kī

kaun hai jis ne yahan apni koi tadbir ki

naql karte aa rahe hain ab talak sab mir ki

ban gai wo sar-waraq meri kitab-e-zat ka

aap ne jo ek nazar is jism par tahrir ki

haziri dene ko gham har roz jate hain wahan

dil bhi goya qabr ho jaise kisi dil-gir ki

hum ne bhi zindan se aise nibhai hai wafa

kaT di hai 'umr kaDiyan chumte zanjir ki

naz se itra rahi hai wo tumhaare sath par

ya'ni mujh se achchhi qismat hai meri taswir ki

raat bhar ek phul ko chuma hai main ne KHwab mein

subh matha chum kar us KHwab ki ta'bir ki