taswir teri yun hi rahe kash jeb mein

tasvīr terī yuuñ hī rahe kaash jeb meñ

goyā ki husn-e-vādī-e-kailāsh jeb meñ

raste meñ mujh ko mil gayā yuuñ hī girā-paḌā

maiñ ne uThā ke rakh liyā ākāsh jeb meñ

pañdrah minute se DhūñD rahā hai na jaane kyā

Daale hue hai haath ko qallāsh jeb meñ

aa jā ki yaar paan ke khokhe pe jam.a haiñ

cigarette chhupā ke haath meñ aur taash jeb

sab tent aur kursiyoñ vaale kamā ga.e

shā.ir ne Thūñs kar bharī shābāsh jeb meñ

ab us ġharīb chor ko bhejoge jail kyuuñ

ġhurbat kī jis ne kaaT lī pādāsh jeb meñ

rakhtā nahīñ huuñ paas meñ apnī kabhī shanāḳht

phirtā hai kaun le ke kabhī laash jeb meñ

taswir teri yun hi rahe kash jeb mein

goya ki husn-e-wadi-e-kailash jeb mein

raste mein mujh ko mil gaya yun hi gira-paDa

main ne uTha ke rakh liya aakash jeb mein

pandrah minute se DhunD raha hai na jaane kya

Dale hue hai hath ko qallash jeb mein

aa ja ki yar pan ke khokhe pe jama hain

cigarette chhupa ke hath mein aur tash jeb

sab tent aur kursiyon wale kama gae

shair ne Thuns kar bhari shabash jeb mein

ab us gharib chor ko bhejoge jail kyun

ghurbat ki jis ne kaT li padash jeb mein

rakhta nahin hun pas mein apni kabhi shanaKHt

phirta hai kaun le ke kabhi lash jeb mein