dukh ki lahr ne chheDa hoga

dukh kī lahr ne chheḌā hogā

yaad ne kankar pheñkā hogā

aaj to merā dil kahtā hai

tū is vaqt akelā hogā

mere chūme hue hāthoñ se

auroñ ko ḳhat likhtā hogā

bhiig chalīñ ab raat kī palkeñ

tū ab thak kar soyā hogā

zard khajūroñ ke jangal meñ

nuur kā dariyā bahtā hogā

rail kī gahrī siiTī sun kar

raat kā jangal gūñjā hogā

shahr ke suune station par

koī musāfir utrā hogā

lambī bal khātī galiyoñ meñ

ik saayā sā phirtā hogā

āñgan meñ phir chiḌiyāñ bolīñ

tū ab so kar uTThā hogā

baal jhaTakte āñkheñ malte

ghar kā darīcha kholā hogā

yādoñ kī jaltī shabnam se

phuul sā chehrā dhotā hogā

motī jaisī shakl banā kar

ā.īne ko taktā hogā

darvāze par dastak sun kar

tū kis naaz se pohñchā hogā

maiñ na sahī koī mujh sā pāgal

tujh ko bulāne aayā hogā

dhyān meñ tujh ko dekh rahā huuñ

tū ab ghar se niklā hogā

bastī ke milne vāloñ se

kyā kyā bāteñ kartā hogā

maiñ ne jinheñ kabhī muñh na lagāyā

tū ab un se miltā hogā

shaam huī ab tū bhī shāyad

apne ghar ko lauTā hogā

shaam ke chalte haath ne tujh ko

merā salām to bhejā hogā

pyāsī kurlātī kūñjoñ ne

merā dukh to sunāyā hogā

merā sāthī shaam kā taarā

tujh se aañkh milātā hogā

niilī dhuñdlī ḳhāmoshī meñ

tāroñ kī dhun suntā hogā

maiñ to aaj bahut royā huuñ

tū bhī shāyad royā hogā

'nāsir' terā miit purānā

tujh ko yaad to aatā hogā

dukh ki lahr ne chheDa hoga

yaad ne kankar phenka hoga

aaj to mera dil kahta hai

tu is waqt akela hoga

mere chume hue hathon se

auron ko KHat likhta hoga

bhig chalin ab raat ki palken

tu ab thak kar soya hoga

zard khajuron ke jangal mein

nur ka dariya bahta hoga

rail ki gahri siTi sun kar

raat ka jangal gunja hoga

shahr ke sune station par

koi musafir utra hoga

lambi bal khati galiyon mein

ek saya sa phirta hoga

aangan mein phir chiDiyan bolin

tu ab so kar uTTha hoga

baal jhaTakte aankhen malte

ghar ka daricha khola hoga

yaadon ki jalti shabnam se

phul sa chehra dhota hoga

moti jaisi shakl bana kar

aaine ko takta hoga

darwaze par dastak sun kar

tu kis naz se pohncha hoga

main na sahi koi mujh sa pagal

tujh ko bulane aaya hoga

dhyan mein tujh ko dekh raha hun

tu ab ghar se nikla hoga

basti ke milne walon se

kya kya baaten karta hoga

main ne jinhen kabhi munh na lagaya

tu ab un se milta hoga

sham hui ab tu bhi shayad

apne ghar ko lauTa hoga

sham ke chalte hath ne tujh ko

mera salam to bheja hoga

pyasi kurlati kunjon ne

mera dukh to sunaya hoga

mera sathi sham ka tara

tujh se aankh milata hoga

nili dhundli KHamoshi mein

taron ki dhun sunta hoga

main to aaj bahut roya hun

tu bhi shayad roya hoga

'nasir' tera mit purana

tujh ko yaad to aata hoga