tha mustaar husn se uske jo nur tha

thā musta.ār husn se us ke jo nuur thā

ḳhurshīd meñ bhī us hī kā zarra zuhūr thā

hañgāma garm-kun jo dil-e-nā-subūr thā

paidā har ek naale se shor-e-nushūr thā

pahuñchā jo aap ko to maiñ pahuñchā ḳhudā ke ta.iiñ

mālūm ab huā ki bahut maiñ bhī duur thā

ātish buland dil kī na thī varna ai kalīm

yak sho.ala barq-e-ḳhiraman-e-sad-koh-e-tūr thā

majlis meñ raat ek tire partave baġhair

kyā sham.a kyā patañg har ik be-huzūr thā

us fasl meñ ki gul kā garebāñ bhī hai havā

dīvāna ho gayā so bahut zī-shu.ūr thā

mun.im ke paas qāqum o sanjāb thā to kyā

us rind kī bhī raat guzar ga.ī jo uur thā

ham ḳhaak meñ mile to mile lekin ai sip.har

us shoḳh ko bhī raah pe laanā zarūr thā

kal paañv ek kāsa-e-sar par jo aa gayā

yaksar vo ustuḳhvān shikastoñ se chuur thā

kahne lagā ki dekh ke chal raah be-ḳhabar

maiñ bhī kabhū kisū kā sar-e-pur-ġhurūr thā

thā vo to rashk-e-hūr-e-bahishtī hamīñ meñ 'mīr'

samjhe na ham to fahm kā apnī qusūr thā

tha mustaar husn se us ke jo nur tha

KHurshid mein bhi us hi ka zarra zuhur tha

hangama garm-kun jo dil-e-na-subur tha

paida har ek nale se shor-e-nushur tha

pahuncha jo aap ko to main pahuncha KHuda ke tain

malum ab hua ki bahut main bhi dur tha

aatish buland dil ki na thi warna ai kalim

yak shoala barq-e-KHiraman-e-sad-koh-e-tur tha

majlis mein raat ek tere partawe baghair

kya shama kya patang har ek be-huzur tha

us fasl mein ki gul ka gareban bhi hai hawa

diwana ho gaya so bahut zi-shuur tha

munim ke pas qaqum o sanjab tha to kya

us rind ki bhi raat guzar gai jo ur tha

hum KHak mein mile to mile lekin ai siphar

us shoKH ko bhi rah pe lana zarur tha

kal panw ek kasa-e-sar par jo aa gaya

yaksar wo ustuKHwan shikaston se chur tha

kahne laga ki dekh ke chal rah be-KHabar

main bhi kabhu kisu ka sar-e-pur-ghurur tha

tha wo to rashk-e-hur-e-bahishti hamin mein 'mir'

samjhe na hum to fahm ka apni qusur tha