sar mein shor-e-justuju dil mein hawa-e-shauq hai

sar meñ shor-e-justujū dil meñ havā-e-shauq hai

ham havāoñ meñ haiñ duniyā zer-e-pā-e-shauq hai

haañ chaman vaalo ḳhirām-e-mauja-e-gul dekhnā

nashsha-āvar in dinoñ āb-o-havā-e-shauq hai

naġhma-e-gul se gul-e-naġhma kā hai ik rābta

vo payām-e-shauq ye zabt-e-sadā-e-shauq hai

ab to vo shart-e-anal-haq bhī nahīñ visvās kyā

ab to chup bhī dil kī manzil meñ nidā-e-shauq hai

TūTtī rangat bikhartī nik.hateñ bujhtī fazā

haa.e kin nāzuk sahāroñ par binā-e-shauq hai

jāma-zebī bhī nasīboñ se hai 'bāqar' ho ki qais

chust kyā lāġhar tanoñ par ye qabā-e-shauq hai

sar mein shor-e-justuju dil mein hawa-e-shauq hai

hum hawaon mein hain duniya zer-e-pa-e-shauq hai

han chaman walo KHiram-e-mauja-e-gul dekhna

nashsha-awar in dinon aab-o-hawa-e-shauq hai

naghma-e-gul se gul-e-naghma ka hai ek rabta

wo payam-e-shauq ye zabt-e-sada-e-shauq hai

ab to wo shart-e-anal-haq bhi nahin wiswas kya

ab to chup bhi dil ki manzil mein nida-e-shauq hai

TuTti rangat bikharti nikhaten bujhti faza

hae kin nazuk sahaaron par bina-e-shauq hai

jama-zebi bhi nasibon se hai 'baqar' ho ki qais

chust kya laghar tanon par ye qaba-e-shauq hai