nishan uske hain sab jo be-nishan hai

nishāñ us ke haiñ sab jo be-nishāñ hai

jidhar dekho vahī jalva-kunāñ hai

azal se tā abad hairat hī hairat

ye duniyā ā.inoñ kī kahkashāñ hai

ye duniyā ā.ina-ḳhāna hai us kā

jidhar dekho vahī to zau-fishāñ hai

tahī-dāman khaḌī huuñ dar pe jis ke

vahī to mālik-e-kaun-o-makāñ hai

vajūd-e-vahm par ho naaz kyūñkar

habāb-e-āb sā saarā jahāñ hai

jo zāhir hai nazar aatā hai tujh ko

ye naqsh-e-bātil-o-vahm-o-gumāñ hai

tirā marnā hai jiine kī 'alāmat

fanā 'saulat' baqā kī dāstāñ hai

nishan us ke hain sab jo be-nishan hai

jidhar dekho wahi jalwa-kunan hai

azal se ta abad hairat hi hairat

ye duniya aainon ki kahkashan hai

ye duniya aaina-KHana hai us ka

jidhar dekho wahi to zau-fishan hai

tahi-daman khaDi hun dar pe jis ke

wahi to malik-e-kaun-o-makan hai

wajud-e-wahm par ho naz kyunkar

habab-e-ab sa sara jahan hai

jo zahir hai nazar aata hai tujh ko

ye naqsh-e-baatil-o-wahm-o-guman hai

tera marna hai jine ki 'alamat

fana 'saulat' baqa ki dastan hai