mein ghash mein hun mujhe itna nahin hosh

meñ ġhash meñ huuñ mujhe itnā nahīñ hosh

tasavvur hai tirā yā tū ham-āġhosh

jo nāloñ kī kabhī vahshat ne Thānī

pukārā zabt bas ḳhāmosh ḳhāmosh

kise ho imtiyāz-e-jalva-e-yār

hameñ to aap hī apnā nahīñ hosh

uThā rakkhā hai ik tūfān tū ne

are qatre tirā allāh-re josh

maiñ aisī yaad ke qurbān jā.ūñ

kiyā jis ne do-ālam ko farāmosh

hai begānoñ se ḳhālī ḳhalvat-e-rāz

chale jaa.eñ na ab aa.eñ mire hosh

karo rindo gunāh-e-mai-parastī

ki saaqī hai atā-pāsh o ḳhatā-posh

tire jalve ko muusā dekhte kyā

naqāb uThne se pahle uḌ ga.e hosh

karam bhī us kā mujh par hai sitam bhī

ki pahlū meñ hai zālim aur rū-posh

piyo to ḳhum ke ḳhum pī jaao 'bedam'

are mai-nosh ho tum yā balā-nosh

mein ghash mein hun mujhe itna nahin hosh

tasawwur hai tera ya tu ham-aghosh

jo nalon ki kabhi wahshat ne Thani

pukara zabt bas KHamosh KHamosh

kise ho imtiyaz-e-jalwa-e-yar

hamein to aap hi apna nahin hosh

uTha rakkha hai ek tufan tu ne

are qatre tera allah-re josh

main aisi yaad ke qurban jaun

kiya jis ne do-alam ko faramosh

hai beganon se KHali KHalwat-e-raaz

chale jaen na ab aaen mere hosh

karo rindo gunah-e-mai-parasti

ki saqi hai ata-pash o KHata-posh

tere jalwe ko musa dekhte kya

naqab uThne se pahle uD gae hosh

karam bhi us ka mujh par hai sitam bhi

ki pahlu mein hai zalim aur ru-posh

piyo to KHum ke KHum pi jao 'bedam'

are mai-nosh ho tum ya bala-nosh