kiye jata hai nazara teri ranai ka

kiye jaatā hai nazāra tirī rā'nā.ī kā

kyā kalejā hai haqīqat meñ tamāshā.ī kā

rakh bharam hashr meñ yā rab dil-e-shaidā.ī kā

hashr to ik baḌā bāzār hai rusvā.ī kā

husn ne kar diyā qābīl ko andhā varna

ḳhuun kartā na kabhī apne sage bhaa.ī kā

asl meñ haath vo dushman kī taraf uTThe the

dekhne vāloñ ko dhoka huā añgḌā.ī kā

aage dīvāna gayā rah gaye daanā pīchhe

qissa-e-dār meñ nukta hai ye dānā.ī kā

ziist kī jang meñ ham haar to deñge lekin

koī imkān nahīñ hai kahīñ paspā.ī kā

kyā kareñge vo masīhā.ī marīz-e-ġham kī

tajraba hī nahīñ jab un ko masīhā.ī kā

shahr meñ kis liye aakar nahīñ rahtā majnūñ

dāḳhila band nahīñ hai kisī sahrā.ī kā

har jagah aur har ik zarre meñ jab haiñ maujūd

naam kyuuñ un ko gavārā nahīñ harjā.ī kā

vo nazar aa.e to dekheñge sañbhal kar us ko

ham haiñ muusā na koī zo'm hai bīnā.ī kā

na mayassar huā ab tak kisī lashkar ko 'adīl'

vo jo andāz hai mizhgāñ kī saf-ārā.ī kā

kiye jata hai nazara teri ra'nai ka

kya kaleja hai haqiqat mein tamashai ka

rakh bharam hashr mein ya rab dil-e-shaidai ka

hashr to ek baDa bazar hai ruswai ka

husn ne kar diya qabil ko andha warna

KHun karta na kabhi apne sage bhai ka

asl mein hath wo dushman ki taraf uTThe the

dekhne walon ko dhoka hua angDai ka

aage diwana gaya rah gaye dana pichhe

qissa-e-dar mein nukta hai ye danai ka

zist ki jang mein hum haar to denge lekin

koi imkan nahin hai kahin paspai ka

kya karenge wo masihai mariz-e-gham ki

tajraba hi nahin jab un ko masihai ka

shahr mein kis liye aakar nahin rahta majnun

daKHila band nahin hai kisi sahrai ka

har jagah aur har ek zarre mein jab hain maujud

nam kyun un ko gawara nahin harjai ka

wo nazar aae to dekhenge sanbhal kar us ko

hum hain musa na koi zo'm hai binai ka

na mayassar hua ab tak kisi lashkar ko 'adil'

wo jo andaz hai mizhgan ki saf-arai ka