tarab-zaron pe kya biti sanam-KHanon pe kya guzri

tarab-zāroñ pe kyā biitī sanam-ḳhānoñ pe kyā guzrī

dil-e-zinda tire marhūm armānoñ pe kyā guzrī

zamīñ ne ḳhuun uglā āsmāñ ne aag barsā.ī

jab insānoñ ke dil badle to insānoñ pe kyā guzrī

hameñ ye fikr un kī anjuman kis haal meñ hogī

unheñ ye ġham ki un se chhuT ke dīvānoñ pe kyā guzrī

mirā ilhād to ḳhair ek la.anat thā so hai ab tak

magar is ālam-e-vahshat meñ īmānoñ pe kyā guzrī

ye manzar kaun sā manzar hai pahchānā nahīñ jaatā

siyah-ḳhānoñ se kuchh pūchho shabistānoñ pe kyā guzrī

chalo vo kufr ke ghar se salāmat aa ga.e lekin

ḳhudā kī mumlikat meñ soḳhta-jānoñ pe kyā guzrī

tarab-zaron pe kya biti sanam-KHanon pe kya guzri

dil-e-zinda tere marhum armanon pe kya guzri

zamin ne KHun ugla aasman ne aag barsai

jab insanon ke dil badle to insanon pe kya guzri

hamein ye fikr un ki anjuman kis haal mein hogi

unhen ye gham ki un se chhuT ke diwanon pe kya guzri

mera ilhad to KHair ek lanat tha so hai ab tak

magar is aalam-e-wahshat mein imanon pe kya guzri

ye manzar kaun sa manzar hai pahchana nahin jata

siyah-KHanon se kuchh puchho shabistanon pe kya guzri

chalo wo kufr ke ghar se salamat aa gae lekin

KHuda ki mumlikat mein soKHta-jaanon pe kya guzri