ajab ishq ke ye fasane lage hain

'ajab 'ishq ke ye fasāne lage haiñ

samajhte samajhte zamāne lage haiñ

jo karte haiñ tausīf be-jā kisī kī

vo insāf kā ḳhuuñ bahāne lage haiñ

bayāñ kar ga.e jo na.ī baat keh kar

vo qisse bahut hī purāne lage haiñ

kisī ġhair kā tazkira ye nahīñ hai

hameñ aaj apne satāne lage haiñ

sunā.e ga.e haiñ jo dānishvaroñ ko

ta'assub se pur vo fasāne lage haiñ

nahīñ vo bhī mahfūz us ke sitam se

jo bārūd rah meñ bichhāne lage haiñ

na zāhir ho chehre se ġham is liye ham

unheñ apne dil meñ dabāne lage haiñ

jahāñ roz tūfān uThtā hai 'ātish'

vahīñ ret kā ghar banāne lage haiñ

'ajab 'ishq ke ye fasane lage hain

samajhte samajhte zamane lage hain

jo karte hain tausif be-ja kisi ki

wo insaf ka KHun bahane lage hain

bayan kar gae jo nai baat keh kar

wo qisse bahut hi purane lage hain

kisi ghair ka tazkira ye nahin hai

hamein aaj apne satane lage hain

sunae gae hain jo danishwaron ko

ta'assub se pur wo fasane lage hain

nahin wo bhi mahfuz us ke sitam se

jo barud rah mein bichhane lage hain

na zahir ho chehre se gham is liye hum

unhen apne dil mein dabane lage hain

jahan roz tufan uThta hai 'atish'

wahin ret ka ghar banane lage hain