viran paDa hai jo wo ghar dekh raha hun

vīrān paḌā hai jo vo ghar dekh rahā huuñ

jaane kā tire aaj asar dekh rahā huuñ

āñgan meñ tujhe apne magar dekh rahā huuñ

jaise ki maiñ sahrā meñ shajar dekh rahā huuñ

bulbul ko hai ab qaid meñ jiinā ye samajh le

sayyād kī tirchhī maiñ nazar dekh rahā huuñ

har shaam sar-e-bām Tahaltī hai hasīna

bach pā.egā kaise ye nagar dekh rahā huuñ

haiñ log hazāroñ jo tujhe dekh rahe haiñ

maiñ gul pe tirī Thahrī nazar dekh rahā huuñ

dil tiir se zaḳhmī hai magar dard nahīñ hai

qātil kī adā us kā hunar dekh rahā huuñ

tanhā huuñ safar par hai faqat chāñd kā saayā

mil jaa.e koī rāhguzar dekh rahā huuñ

jaane se tire haal hai afsurda ye dil kā

sahrā meñ kabhī dasht meñ ghar dekh rahā huuñ

jis tarh nashe meñ koī mahbūb ko dekhe

maiñ raat kā jaagā huuñ sahar dekh rahā huuñ

is 'ishq meñ majnūñ kī qabā oḌh lī meñ ne

lailā hai kidhar aur kidhar dekh rahā huuñ

'ummān' ne ġhazloñ meñ liyā naam jo terā

hai zikr tirā ab maiñ jidhar dekh rahā huuñ

viran paDa hai jo wo ghar dekh raha hun

jaane ka tere aaj asar dekh raha hun

aangan mein tujhe apne magar dekh raha hun

jaise ki main sahra mein shajar dekh raha hun

bulbul ko hai ab qaid mein jina ye samajh le

sayyaad ki tirchhi main nazar dekh raha hun

har sham sar-e-baam Tahalti hai hasina

bach paega kaise ye nagar dekh raha hun

hain log hazaron jo tujhe dekh rahe hain

main gul pe teri Thahri nazar dekh raha hun

dil tir se zaKHmi hai magar dard nahin hai

qatil ki ada us ka hunar dekh raha hun

tanha hun safar par hai faqat chand ka saya

mil jae koi rahguzar dekh raha hun

jaane se tere haal hai afsurda ye dil ka

sahra mein kabhi dasht mein ghar dekh raha hun

jis tarh nashe mein koi mahbub ko dekhe

main raat ka jaga hun sahar dekh raha hun

is 'ishq mein majnun ki qaba oDh li mein ne

laila hai kidhar aur kidhar dekh raha hun

'umman' ne ghazlon mein liya nam jo tera

hai zikr tera ab main jidhar dekh raha hun