wadi-e-ishq se hote hue jaane ke liye
vādī-e-'ishq se hote hue jaane ke liye
dil laraztā hai mirā Thokareñ khāne ke liye
phir musavvir ne ka.ī rang bhare haiñ is meñ
mere kirdār ko tasvīr meñ laane ke liye
jo milātā thā tujhe mujh se ḳhatoñ ke zariye
vo kabūtar na rahā ḳhat tire laane ke liye
ab mohabbat meñ kashish bhī nahīñ pahle jaisī
koī kāñdhā bhī nahīñ ashk bahāne ke liye
ham ne māñgā hī nahīñ tujh ko du'āoñ meñ kabhī
bas tirā naam liyā yaad dilāne ke liye
DhūñDte DhūñDte maiñ thak sā gayā huuñ 'zāhir'
us sā mil jaa.e koī dil ko lubhāne ke liye
wadi-e-'ishq se hote hue jaane ke liye
dil larazta hai mera Thokaren khane ke liye
phir musawwir ne kai rang bhare hain is mein
mere kirdar ko taswir mein lane ke liye
jo milata tha tujhe mujh se KHaton ke zariye
wo kabutar na raha KHat tere lane ke liye
ab mohabbat mein kashish bhi nahin pahle jaisi
koi kandha bhi nahin ashk bahane ke liye
hum ne manga hi nahin tujh ko du'aon mein kabhi
bas tera nam liya yaad dilane ke liye
DhunDte DhunDte main thak sa gaya hun 'zahir'
us sa mil jae koi dil ko lubhane ke liye
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
