tum to kahte ho ki hai sara jahan mere liye

tum to kahte ho ki hai saarā jahāñ mere liye

kyuuñ nahīñ miltā hai phir ik mehrbāñ mere liye

maiñ usī raste pe chal kar apnī manzil pā.ūñgā

chhoḌ kar jis par ga.e haiñ vo nishāñ mere liye

lauT kar maiñ ā.ūñgā ik roz tere vāste

itnī kyoñ bechain hai ai jān-e-jāñ mere liye

jalva-e-jānāñ se raushan ho gayā hai merā dil

hai añdherī raat ab to kahkashāñ mere liye

roz mil jaatī hai mujh ko kāmyābī kī Dagar

roz hotā hai nayā ik imtihāñ mere liye

aap hī ne pher lī mujh se nigāh-e-multafit

aap hī to the faqat ik sā.ebāñ mere liye

maiñ to un ke gesū-e-ḳhamdār meñ uljhā rahā

mai-kade se roz aatī hai azaañ mere liye

maiñ zamīñ par huuñ magar merī uḌāneñ dekh kar

raat din gardish meñ haiñ saat āsmāñ mere liye

dekh kar us be-vafā ko ho gayā ehsās ab

maiñ to huuñ us ke liye aur vo kahāñ mere liye

haañ vahī ik shaḳhs thā raunaq mire ghar baar kī

vo gayā to kuchh nahīñ merā makāñ mere liye

yuuñ to sab hamdard haiñ lekin haqīqat meñ 'nizām'

shahr meñ koī nahīñ hai mehrbāñ mere liye

tum to kahte ho ki hai sara jahan mere liye

kyun nahin milta hai phir ek mehrban mere liye

main usi raste pe chal kar apni manzil paunga

chhoD kar jis par gae hain wo nishan mere liye

lauT kar main aaunga ek roz tere waste

itni kyon bechain hai ai jaan-e-jaan mere liye

jalwa-e-jaanan se raushan ho gaya hai mera dil

hai andheri raat ab to kahkashan mere liye

roz mil jati hai mujh ko kaamyabi ki Dagar

roz hota hai naya ek imtihan mere liye

aap hi ne pher li mujh se nigah-e-multafit

aap hi to the faqat ek saeban mere liye

main to un ke gesu-e-KHamdar mein uljha raha

mai-kade se roz aati hai azan mere liye

main zamin par hun magar meri uDanen dekh kar

raat din gardish mein hain sat aasman mere liye

dekh kar us be-wafa ko ho gaya ehsas ab

main to hun us ke liye aur wo kahan mere liye

han wahi ek shaKHs tha raunaq mere ghar bar ki

wo gaya to kuchh nahin mera makan mere liye

yun to sab hamdard hain lekin haqiqat mein 'nizam'

shahr mein koi nahin hai mehrban mere liye