to ab mujhse kinara kar liya hai

to ab mujh se kinārā kar liyā hai

chalo ye tum ne achchhā kar liyā hai

mohabbat kā zamāna dekhne ko

zamāne bhar se jhagḌā kar liyā hai

jafā us chāñd par jachtī nahīñ hai

so ham ne ḳhud ko mailā kar liyā hai

to ab ye raat bhī tanhā kaTegī

sitāroñ se bhī jhagḌā kar liyā hai

mohabbat kī hai par is ke 'alāva

na-jāne aur kyā kyā kar liyā hai

to ab tai hai mirā barbād honā

ki phir tujh par bharosa kar liyā hai

kuchh aise pal rahe haiñ peT apne

ġharībī ko tamāsha kar liyā hai

kisī kī yaad meñ tanhā shajar ne

bharī shāḳhoñ ko suunā kar liyā hai

to ab mujh se kinara kar liya hai

chalo ye tum ne achchha kar liya hai

mohabbat ka zamana dekhne ko

zamane bhar se jhagDa kar liya hai

jafa us chand par jachti nahin hai

so hum ne KHud ko maila kar liya hai

to ab ye raat bhi tanha kaTegi

sitaron se bhi jhagDa kar liya hai

mohabbat ki hai par is ke 'alawa

na-jaane aur kya kya kar liya hai

to ab tai hai mera barbaad hona

ki phir tujh par bharosa kar liya hai

kuchh aise pal rahe hain peT apne

gharibi ko tamasha kar liya hai

kisi ki yaad mein tanha shajar ne

bhari shaKHon ko suna kar liya hai