tanhaiyon mein hun ki paziraiyon mein hun

tanhā.iyoñ meñ huuñ ki pazīrā.iyoñ meñ huuñ

shāyad ki ab kī baar tamāshā.iyoñ meñ huuñ

mujh ko nahīñ ḳhabar ki kahāñ hai mirā vujūd

us ko ye lag rahā hai ki gahrā.iyoñ meñ huuñ

maiñ ḳhud pe ḳhanda-zan huuñ mire ā.ina-jamāl

yūsuf nahīñ huuñ phir bhī zuleḳhā.iyoñ meñ huuñ

maiñ kal sitam-zada thā kisī misr meñ magar

ab aisā zaḳhm huuñ jo masīhā.iyoñ meñ huuñ

kyā ḳhuub hai ki kal to gunāhoñ meñ mast thā

kyā baat hai ki aaj maiñ achchhā.iyoñ meñ huuñ

vahshat ke aise daur bhī aate haiñ dasht meñ

mujh ko to aisā lagtā hai yaktā.iyoñ meñ huuñ

raste meñ chaar log mujhe ghūrte hue

yuuñ lag rahā hai jaise maiñ bīnā.iyoñ meñ huuñ

vo shaḳhs mere sāmne dam toḌtā huā

'bāsit' magar maiñ phir bhī shakebā.iyoñ meñ huuñ

tanhaiyon mein hun ki paziraiyon mein hun

shayad ki ab ki bar tamashaiyon mein hun

mujh ko nahin KHabar ki kahan hai mera wujud

us ko ye lag raha hai ki gahraiyon mein hun

main KHud pe KHanda-zan hun mere aaina-jamal

yusuf nahin hun phir bhi zuleKHaiyon mein hun

main kal sitam-zada tha kisi misr mein magar

ab aisa zaKHm hun jo masihaiyon mein hun

kya KHub hai ki kal to gunahon mein mast tha

kya baat hai ki aaj main achchhaiyon mein hun

wahshat ke aise daur bhi aate hain dasht mein

mujh ko to aisa lagta hai yaktaiyon mein hun

raste mein chaar log mujhe ghurte hue

yun lag raha hai jaise main binaiyon mein hun

wo shaKHs mere samne dam toDta hua

'basit' magar main phir bhi shakebaiyon mein hun