shajar kahin par koi dikhai paDe to pal bhar Thahar bhi jae

shajar kahīñ par koī dikhā.ī paḌe to pal bhar Thahar bhī jaa.e

musāfir-e-dil ko manzil-e-jāñ mile to ḳhū-e-safar bhī jaa.e

kahā thā kis ne ki haath thāmo havā kā ai barg-e-ḳhushk-o-ḳhasta

havā kī marzī hai ab to pyāre jahāñ bhī jaa.e jidhar bhī jaa.e

milegā jab vo na jaane us vaqt sūrat-e-hāl kyā ho dil kī

ki misl-e-taqdīr-e-muflisāñ hai bigaḌ bhī jaa.e sañvar bhī jaa.e

ye kyā sitam hai ki ham pe lagtī hai jab bhī lagtī hai koī tohmat

kabhī to ai shahr koī ilzām shahr-yāroñ ke sar bhī jaa.e

sadā lagāne meñ 'uzr koī nahīñ mujhe munsifoñ ke dar par

magar koī raah koī rasta koī galī un ke ghar bhī jaa.e

chalā to huuñ us ke dar pe īfā-e-'ahd kī aas le ke lekin

vahī na ho is gadāgarī meñ qalandarī kā hunar bhī jaa.e

ġhurūb ke vaqt se chhatoñ par khaḌe khaḌe log thak ga.e haiñ

guzarne vaalā hai koī sailāb shahr se to guzar bhī jaa.e

jahāñ mirā khet thā vahāñ ret Dāltā jā rahā hai paanī

mire liye farq kyā paḌegā jo ab ye dariyā utar bhī jaa.e

basī huī us kī nik.hatoñ meñ havā usī tarh chal rahī hai

chalā gayā hai vo bāġh-e-dil se to us kā paiġhāmbar bhī jaa.e

firāq meñ jis ke thamte thamte bachā hai dil jab vo be-ḳhabar hai

to phir mujhe kyā mirī balā se agar dil-e-zinda mar bhī jaa.e

use bahut dukh hai merī tanhā.iyoñ kā maiñ jāntā huuñ lekin

agar vo tanhā huā aur us ko pukār luuñ maiñ to Dar bhī jaa.e

abhī to mahfūz hai kitāb-e-hayāt meñ phuul tere ġham kā

varaq havā-e-fanā ne ulTe kabhī to shāyad bikhar bhī jaa.e

'ufuq ke us paar shahr-e-ḳhurshīd meñ sahar muntazir hai merī

vo keh rahe haiñ ki dekh luuñ maiñ magar vahāñ tak nazar bhī jaa.e

shajar kahin par koi dikhai paDe to pal bhar Thahar bhi jae

musafir-e-dil ko manzil-e-jaan mile to KHu-e-safar bhi jae

kaha tha kis ne ki hath thamo hawa ka ai barg-e-KHushk-o-KHasta

hawa ki marzi hai ab to pyare jahan bhi jae jidhar bhi jae

milega jab wo na jaane us waqt surat-e-haal kya ho dil ki

ki misl-e-taqdir-e-muflisan hai bigaD bhi jae sanwar bhi jae

ye kya sitam hai ki hum pe lagti hai jab bhi lagti hai koi tohmat

kabhi to ai shahr koi ilzam shahr-yaron ke sar bhi jae

sada lagane mein 'uzr koi nahin mujhe munsifon ke dar par

magar koi rah koi rasta koi gali un ke ghar bhi jae

chala to hun us ke dar pe ifa-e-'ahd ki aas le ke lekin

wahi na ho is gadagari mein qalandari ka hunar bhi jae

ghurub ke waqt se chhaton par khaDe khaDe log thak gae hain

guzarne wala hai koi sailab shahr se to guzar bhi jae

jahan mera khet tha wahan ret Dalta ja raha hai pani

mere liye farq kya paDega jo ab ye dariya utar bhi jae

basi hui us ki nikhaton mein hawa usi tarh chal rahi hai

chala gaya hai wo bagh-e-dil se to us ka paighambar bhi jae

firaq mein jis ke thamte thamte bacha hai dil jab wo be-KHabar hai

to phir mujhe kya meri bala se agar dil-e-zinda mar bhi jae

use bahut dukh hai meri tanhaiyon ka main jaanta hun lekin

agar wo tanha hua aur us ko pukar lun main to Dar bhi jae

abhi to mahfuz hai kitab-e-hayat mein phul tere gham ka

waraq hawa-e-fana ne ulTe kabhi to shayad bikhar bhi jae

'ufuq ke us par shahr-e-KHurshid mein sahar muntazir hai meri

wo keh rahe hain ki dekh lun main magar wahan tak nazar bhi jae