sach hai ki wo maidan mein jita bhi nahin tha

sach hai ki vo maidān meñ jiitā bhī nahīñ thā

zālim se magar jang meñ haarā bhī nahīñ thā

jis tarh mujhe chhoḌā thā achchhā bhī nahīñ thā

jo us ne diyā mujh ko vo dhoka bhī nahīñ thā

har vaqt mire saath thiiñ us shaḳhs kī yādeñ

tanhā bhī rahā aur maiñ tanhā bhī nahīñ thā

āñkhoñ meñ judā.ī kā asar saaf thā lekin

jaate hue us ne mujhe rokā bhī nahīñ thā

ye dard kī sauġhāt vo kyuuñ de ke gayā hai

is darja to us shaḳhs ko chāhā bhī nahīñ thā

tūfān mire qad ke nahīñ aayā barābar

tum chhoḌ ga.e aur maiñ Duubā bhī nahīñ thā

is rasm-e-vidā'ī kī zarūrat thī abhī kyā

jī bhar ke abhī aap ko dekhā bhī nahīñ thā

kyuuñ us ke liye bhiig rahī haiñ mirī āñkheñ

jis shaḳhs se merā koī rishta bhī nahīñ thā

sach hai ki wo maidan mein jita bhi nahin tha

zalim se magar jang mein haara bhi nahin tha

jis tarh mujhe chhoDa tha achchha bhi nahin tha

jo us ne diya mujh ko wo dhoka bhi nahin tha

har waqt mere sath thin us shaKHs ki yaaden

tanha bhi raha aur main tanha bhi nahin tha

aankhon mein judai ka asar saf tha lekin

jate hue us ne mujhe roka bhi nahin tha

ye dard ki saughat wo kyun de ke gaya hai

is darja to us shaKHs ko chaha bhi nahin tha

tufan mere qad ke nahin aaya barabar

tum chhoD gae aur main Duba bhi nahin tha

is rasm-e-wida'i ki zarurat thi abhi kya

ji bhar ke abhi aap ko dekha bhi nahin tha

kyun us ke liye bhig rahi hain meri aankhen

jis shaKHs se mera koi rishta bhi nahin tha