raushni mein safar mein rahte hain

raushnī meñ safar meñ rahte haiñ

vaqt kī rah-guzar meñ rahte haiñ

shahr meñ būd-o-bāsh hai apnī

shab-guzārī ko ghar meñ rahte haiñ

jo mile the hameñ kitāboñ meñ

jaane vo kis nagar meñ rahte haiñ

dar-o-dīvār se nikal kar ham

fikr-e-dīvār-o-dar meñ rahte haiñ

chauñk paḌte haiñ apnī chaap se log

dasht-e-vahshat-asar meñ rahte haiñ

lafz ko jhuuT sach kī de ke sanad

ḳhud saf-e-mo'atabar meñ rahte haiñ

be-panāhī ke ḳhauf se larzāñ

apne tan ke shajar meñ rahte haiñ

raushni mein safar mein rahte hain

waqt ki rah-guzar mein rahte hain

shahr mein bud-o-bash hai apni

shab-guzari ko ghar mein rahte hain

jo mile the hamein kitabon mein

jaane wo kis nagar mein rahte hain

dar-o-diwar se nikal kar hum

fikr-e-diwar-o-dar mein rahte hain

chaunk paDte hain apni chap se log

dasht-e-wahshat-asar mein rahte hain

lafz ko jhuT sach ki de ke sanad

KHud saf-e-mo'atabar mein rahte hain

be-panahi ke KHauf se larzan

apne tan ke shajar mein rahte hain