raha aaKHirat se main be-KHabar yun jahan-e-bagh-o-bahaar mein

rahā āḳhirat se maiñ be-ḳhabar yuuñ jahān-e-bāġh-o-bahār meñ

kabhī ḳhushbuoñ ke safar meñ thā kabhī jugnuoñ kī qatār meñ

tirī dars-gāh meñ thā magar na thī ruuh shāmil-e-guftugū

mujhe ḳhush-ravī bhī burī lagī vo kamī thī dil ke qarār meñ

sar-e-ḳhāmushī ye sajāvaTeñ usī rang-o-bū kī misāl haiñ

jo mahak ho qabr ke phuul meñ jo chamak ho sham'-e-mazār meñ

vo chaman thā mamba'-e-rang-o-bū ka.ī phuul the sar-e-bostāñ

vo jo ḳhushbuoñ kī misāl hoñ koī ek do the hazār meñ

mirī baat ‘rāzī’-e-nukta-chīñ jo burī lage to ḳhamosh rah

tū ye 'umr yuuñ hī gañvā na de mirī laġhzishoñ ke shumār meñ

raha aaKHirat se main be-KHabar yun jahan-e-bagh-o-bahaar mein

kabhi KHushbuon ke safar mein tha kabhi jugnuon ki qatar mein

teri dars-gah mein tha magar na thi ruh shamil-e-guftugu

mujhe KHush-rawi bhi buri lagi wo kami thi dil ke qarar mein

sar-e-KHamushi ye sajawaTen usi rang-o-bu ki misal hain

jo mahak ho qabr ke phul mein jo chamak ho sham'-e-mazar mein

wo chaman tha mamba'-e-rang-o-bu kai phul the sar-e-bostan

wo jo KHushbuon ki misal hon koi ek do the hazar mein

meri baat ‘raazi’-e-nukta-chin jo buri lage to KHamosh rah

tu ye 'umr yun hi ganwa na de meri laghzishon ke shumar mein