jazba-e-iKHlas ki har-ja kami mahsus ho

jazba-e-iḳhlās kī har-jā kamī mahsūs ho

ab to ham-sāya bhī jaise ajnabī mahsūs ho

kal koī aazar mile aisā ki jis ke lams se

kyā 'ajab in pattharoñ meñ zindagī mahsūs ho

is liye sham'eñ jalā.ī haiñ sar-e-nok-e-mizha

aane vāloñ ko bhī kuchh to raushnī mahsūs ho

karb ke rishte se soche aaj kā insāñ to phir

ajnabī chehroñ se bhī vābastagī mahsūs ho

jis ko dekho aap meñ gum dūsroñ se be-niyāz

anjuman meñ aa ke bhī ik ḳhāmushī mahsūs ho

pesh-goī ham ne jo ash'ār meñ kī thī kabhī

ab to har jānib usī kī guuñj sī mahsūs ho

zindagī bhar karb kī suulī pe ham laTke raheñ

dekhne vāloñ ko lekin dil-lagī mahsūs ho

jazba-e-iKHlas ki har-ja kami mahsus ho

ab to ham-saya bhi jaise ajnabi mahsus ho

kal koi aazar mile aisa ki jis ke lams se

kya 'ajab in pattharon mein zindagi mahsus ho

is liye sham'en jalai hain sar-e-nok-e-mizha

aane walon ko bhi kuchh to raushni mahsus ho

karb ke rishte se soche aaj ka insan to phir

ajnabi chehron se bhi wabastagi mahsus ho

jis ko dekho aap mein gum dusron se be-niyaz

anjuman mein aa ke bhi ek KHamushi mahsus ho

pesh-goi hum ne jo ash'ar mein ki thi kabhi

ab to har jaanib usi ki gunj si mahsus ho

zindagi bhar karb ki suli pe hum laTke rahen

dekhne walon ko lekin dil-lagi mahsus ho