jab zaban rakkhi hai maine halqa-e-zanjir mein

jab zabāñ rakkhī hai maiñ ne halqa-e-zanjīr meñ

tab kahīñ aa.ī hai shiddat she'r kī tāsīr meñ

canvas par zehn ke the yaad ke paikar 'ajīb

parda-e-māzī se nikle chhup ga.e tasvīr meñ

dushmanoñ ke ḳhauf-o-vahshat ke liye kaafī rahī

jo khanak baaqī thī zang-ālūd is shamshīr meñ

daftar-o-bāzār ḳhālī har galī meñ ḳhāmushī

kyā ḳhabar thī ye bhī din the shahr kī taqdīr meñ

chāñd chhup jaatā thā aksar bādaloñ ke darmiyāñ

chāñdnī shāmil thī phir bhī shoḳhī-e-shab-gīr meñ

be-karāñ haiñ lazzateñ 'rāzī' kisī bhī ḳhvāb ke

TuuT jaane meñ mukammal hone meñ tāḳhīr meñ

jab zaban rakkhi hai main ne halqa-e-zanjir mein

tab kahin aai hai shiddat she'r ki tasir mein

canwas par zehn ke the yaad ke paikar 'ajib

parda-e-mazi se nikle chhup gae taswir mein

dushmanon ke KHauf-o-wahshat ke liye kafi rahi

jo khanak baqi thi zang-alud is shamshir mein

daftar-o-bazar KHali har gali mein KHamushi

kya KHabar thi ye bhi din the shahr ki taqdir mein

chand chhup jata tha aksar baadalon ke darmiyan

chandni shamil thi phir bhi shoKHi-e-shab-gir mein

be-karan hain lazzaten 'raazi' kisi bhi KHwab ke

TuT jaane mein mukammal hone mein taKHir mein