jab bhi KHwabon ka safar yaad aaya

jab bhī ḳhvāboñ kā safar yaad aayā

dil kā ek ek khañDar yaad aayā

jab bhī yaad aayā koī ġhuncha-dahan

mujh ko ḳhushbū kā safar yaad aayā

jab bhī dekhā hai ḳharāba koī

ek apnā bhī thā ghar yaad aayā

yuuñ bhī hogā na pareshān koī

dil ko thāmā to jigar yaad aayā

jo diyā maiñ ne bujhā Daalā hai

jal marūñgā vo agar yaad aayā

daur-e-vahshat bhī yūñhī biit gayā

haath yaad aa.e na sar yaad aayā

jurm ye hai ki re'āyā huuñ maiñ

kyuuñ huā shahr-badar yaad aayā

dasht meñ dekh ke qadmoñ ke nishāñ

maiñ hī aayā thā idhar yaad aayā

phir vahī maiñ huuñ vahī shām-o-sahar

ghar se ghar tak kā safar yaad aayā

intiqāman mujhe yaad aa jaanā

maiñ kabhī tujh ko agar yaad aayā

jab bhi KHwabon ka safar yaad aaya

dil ka ek ek khanDar yaad aaya

jab bhi yaad aaya koi ghuncha-dahan

mujh ko KHushbu ka safar yaad aaya

jab bhi dekha hai KHaraba koi

ek apna bhi tha ghar yaad aaya

yun bhi hoga na pareshan koi

dil ko thama to jigar yaad aaya

jo diya main ne bujha Dala hai

jal marunga wo agar yaad aaya

daur-e-wahshat bhi yunhi bit gaya

hath yaad aae na sar yaad aaya

jurm ye hai ki re'aya hun main

kyun hua shahr-badar yaad aaya

dasht mein dekh ke qadmon ke nishan

main hi aaya tha idhar yaad aaya

phir wahi main hun wahi sham-o-sahar

ghar se ghar tak ka safar yaad aaya

intiqaman mujhe yaad aa jaana

main kabhi tujh ko agar yaad aaya