is se pahle ki main gir jaun kisi khai mein

is se pahle ki maiñ gir jā.ūñ kisī khaa.ī meñ

apnī āvāz milāo mirī bīnā.ī meñ

lafz-dar-lafz vo khulne ko thā bechain magar

maiñ ki uljhā rahā uslūb kī rā'nā.ī meñ

muskurāhaT thī laboñ par to badan par larza

Dar bhī shāmil thā kahīñ hausla-afzā.ī meñ

milne vaalā nahīñ kuchh gauhar-e-maqsūd unheñ

jo tafaḳhḳhur liye baiThe haiñ jabīñ-sā.ī meñ

sar uThātī hai mire dil meñ ye ḳhvāhish aksar

tū kabhī aa ke muḳhil ho mirī tanhā.ī meñ

ai badan oḌhne vaale tujhe ik baat kahūñ

jhāñk kar dekh kabhī ruuh kī gahrā.ī meñ

har ta'alluq hai tilā.ī tirā aur maiñ nādār

kaise apnā.ūñ tujhe zor kī mahñgā.ī meñ

chāhtā huuñ mirā har she'r khule tujh dil par

varna kyā rakkhā hai is qāfiya-paimā.ī meñ

is se pahle ki main gir jaun kisi khai mein

apni aawaz milao meri binai mein

lafz-dar-lafz wo khulne ko tha bechain magar

main ki uljha raha uslub ki ra'nai mein

muskurahaT thi labon par to badan par larza

Dar bhi shamil tha kahin hausla-afzai mein

milne wala nahin kuchh gauhar-e-maqsud unhen

jo tafaKHKHur liye baiThe hain jabin-sai mein

sar uThati hai mere dil mein ye KHwahish aksar

tu kabhi aa ke muKHil ho meri tanhai mein

ai badan oDhne wale tujhe ek baat kahun

jhank kar dekh kabhi ruh ki gahrai mein

har ta'alluq hai tilai tera aur main nadar

kaise apnaun tujhe zor ki mahngai mein

chahta hun mera har she'r khule tujh dil par

warna kya rakkha hai is qafiya-paimai mein