husn tha jo tere baam-o-dar ka

husn thā jo tire bām-o-dar kā

zard patta huuñ maiñ us shajar kā

maiñ ne saa.e ko insān jaanā

khā gayā mujh ko dhokā nazar kā

sab kareñ chāñd tāroñ kī bāteñ

koī rasta dikhā.e na ghar kā

saath de pyaar to dil se dil tak

fāsla hai faqat ik nazar kā

aa basī mere vīrān dil meñ

shauq thā raushnī ko safar kā

kar gayā kuuch mere bhī dil se

jaane raahī thā vo kis nagar kā

ye hamārī mohabbat ke charche

shor vaadī meñ jaise gajar kā

asl vīrāniyāñ to haiñ dil meñ

kab ye naqsha thā dīvār-o-dar kā

apnī apnī 'ibādat hai sab kī

apnā apnā ḳhudā har bashar kā

kis ko hai ab 'qatīl' itnī fursat

kaun sāthī bane 'umr bhar kā

husn tha jo tere baam-o-dar ka

zard patta hun main us shajar ka

main ne sae ko insan jaana

kha gaya mujh ko dhoka nazar ka

sab karen chand taron ki baaten

koi rasta dikhae na ghar ka

sath de pyar to dil se dil tak

fasla hai faqat ek nazar ka

aa basi mere viran dil mein

shauq tha raushni ko safar ka

kar gaya kuch mere bhi dil se

jaane rahi tha wo kis nagar ka

ye hamari mohabbat ke charche

shor wadi mein jaise gajar ka

asl viraniyan to hain dil mein

kab ye naqsha tha diwar-o-dar ka

apni apni 'ibaadat hai sab ki

apna apna KHuda har bashar ka

kis ko hai ab 'qatil' itni fursat

kaun sathi bane 'umr bhar ka