hudud-e-zabt se aage bhi ja nahin sakta

hudūd-e-zabt se aage bhī jā nahīñ saktā

magar jo guzrī hai mujh par batā nahīñ saktā

tire vujūd ko baḳhshī hai dil-kashī maiñ ne

bichhaḌ ke mujh se tū ḳhud ko bhī pā nahīñ saktā

hazāroñ tiir to un kī kamāñ se aa.e haiñ

zabāñ pe naam bhī jin kā maiñ lā nahīñ saktā

usī ko log mirā ham-safar samajhte haiñ

jo do qadam bhī mire saath aa nahīñ saktā

mire vujūd meñ paivast haiñ tirī yādeñ

tirā ḳhayāl mire dil se jā nahīñ saktā

jo zaḳhm tum ne diye the vahī hare haiñ abhī

maiñ aur koī nayā zaḳhm khā nahīñ saktā

maiñ apne haal pe is darja hañs chukā 'māhir'

tirā latīfa bhī mujh ko hañsā nahīñ saktā

hudud-e-zabt se aage bhi ja nahin sakta

magar jo guzri hai mujh par bata nahin sakta

tere wujud ko baKHshi hai dil-kashi main ne

bichhaD ke mujh se tu KHud ko bhi pa nahin sakta

hazaron tir to un ki kaman se aae hain

zaban pe nam bhi jin ka main la nahin sakta

usi ko log mera ham-safar samajhte hain

jo do qadam bhi mere sath aa nahin sakta

mere wujud mein paiwast hain teri yaaden

tera KHayal mere dil se ja nahin sakta

jo zaKHm tum ne diye the wahi hare hain abhi

main aur koi naya zaKHm kha nahin sakta

main apne haal pe is darja hans chuka 'mahir'

tera latifa bhi mujh ko hansa nahin sakta