din ki punji ek thakan hai raat bahut begani hai

din kī pūñjī ek thakan hai raat bahut begānī hai

ā.īne meñ sūrat apnī kuchh jaanī pahchānī hai

be-mā'nī se ek safar kā qissa jo tūlānī hai

kaun sunā jaatā hai mujh ko kis kī rām-kahānī hai

'umr-e-gurezāñ se kyā lenā lamha lamha biit gayā

us kā chehra yaad aatā hai yaad us kī lāfānī hai

jaanī pahchānī rāhoñ par ham pahle bhaTke lekin

manzil shāyad paas aa pahuñchī raah bahut an-jānī hai

abr havā mausam ko le kar paas tire aa baiThe haiñ

kuchh ḳhātir apnī bhī kar lo do din kī mehmānī hai

dil Thukrā ke kis daulat ke pīchhe bhāge phirte ho

dil ke sivā jitnī daulat hai saarī ānī-jānī hai

ab tak ye hotā aayā hai aage kā mā'lūm nahīñ

‘ā'zmī’ sāhab is kūche meñ aakar jaan gañvānī hai

din ki punji ek thakan hai raat bahut begani hai

aaine mein surat apni kuchh jaani pahchani hai

be-ma'ni se ek safar ka qissa jo tulani hai

kaun suna jata hai mujh ko kis ki ram-kahani hai

'umr-e-gurezan se kya lena lamha lamha bit gaya

us ka chehra yaad aata hai yaad us ki lafani hai

jaani pahchani rahon par hum pahle bhaTke lekin

manzil shayad pas aa pahunchi rah bahut an-jaani hai

abr hawa mausam ko le kar pas tere aa baiThe hain

kuchh KHatir apni bhi kar lo do din ki mehmani hai

dil Thukra ke kis daulat ke pichhe bhage phirte ho

dil ke siwa jitni daulat hai sari aani-jaani hai

ab tak ye hota aaya hai aage ka ma'lum nahin

‘a'zmi’ sahab is kuche mein aakar jaan ganwani hai