dil mera toD kar gae tum bhi

dil mirā toḌ kar ga.e tum bhī

ruḳh bachā ke guzar ga.e tum bhī

jaanā kab thā magar ga.e tum bhī

is zamāne se Dar ga.e tum bhī

vo jidhar thā udhar ga.e tum bhī

sāmne se mukar ga.e tum bhī

jaise duniyā utaar pheñkī hai

vaise dil se utar ga.e tum bhī

maiñ samajhtā thā tum samajhte ho

yaar daulat pe mar ga.e tum bhī

tum bhī zālim kā saath dene lage

apne ajdād par ga.e tum bhī

tum ne duniyā sameT lī thī magar

chhoḌ kar māl-o-zar ga.e tum bhī

un se keh deñ mileñ 'nizām' agar

nafrateñ dil meñ bhar ga.e tum bhī

dil mera toD kar gae tum bhi

ruKH bacha ke guzar gae tum bhi

jaana kab tha magar gae tum bhi

is zamane se Dar gae tum bhi

wo jidhar tha udhar gae tum bhi

samne se mukar gae tum bhi

jaise duniya utar phenki hai

waise dil se utar gae tum bhi

main samajhta tha tum samajhte ho

yar daulat pe mar gae tum bhi

tum bhi zalim ka sath dene lage

apne ajdad par gae tum bhi

tum ne duniya sameT li thi magar

chhoD kar mal-o-zar gae tum bhi

un se keh den milen 'nizam' agar

nafraten dil mein bhar gae tum bhi