buland hun main kahan auj-e-asman ki tarah

buland huuñ maiñ kahāñ auj-e-āsmāñ kī tarah

mirā vujūd hai bas ḳhāk-e-nā-tavāñ kī tarah

mire safar kī na rūdād pūchhiye mujh se

maiñ rāh-e-shauq meñ huuñ gard-e-kārvāñ kī tarah

maiñ kaise naaz karūñ apne aap par logo

hai zindagī mirī TuuTī huī kamāñ kī tarah

ye kaisā daur mire sāmne chalā aayā

bahār bhī hai yahāñ mausam-e-ḳhizāñ kī tarah

paḌhā to ashk se labrez ho ga.iiñ āñkheñ

hai dāstān tirī merī dāstāñ kī tarah

kisī davā se miTā hai na ye miTegā kabhī

hai dard-e-'ishq mire dil meñ mehrbāñ kī tarah

maiñ apnī jaan bhī de kar kahūñgā ai 'ātish'

mujhe na pyaar milegā kabhī yahāñ kī tarah

buland hun main kahan auj-e-asman ki tarah

mera wujud hai bas KHak-e-na-tawan ki tarah

mere safar ki na rudad puchhiye mujh se

main rah-e-shauq mein hun gard-e-karwan ki tarah

main kaise naz karun apne aap par logo

hai zindagi meri TuTi hui kaman ki tarah

ye kaisa daur mere samne chala aaya

bahaar bhi hai yahan mausam-e-KHizan ki tarah

paDha to ashk se labrez ho gain aankhen

hai dastan teri meri dastan ki tarah

kisi dawa se miTa hai na ye miTega kabhi

hai dard-e-'ishq mere dil mein mehrban ki tarah

main apni jaan bhi de kar kahunga ai 'atish'

mujhe na pyar milega kabhi yahan ki tarah