ajib shahr ka manzar dikhai deta hai

'ajīb shahr kā manzar dikhā.ī detā hai

har ek haath meñ ḳhanjar dikhā.ī detā hai

tirī galī meñ jo aksar dikhā.ī detā hai

kuchh us ke paañv meñ chakkar dikhā.ī detā hai

vo ashk jis kā tasalsul hai chashm-e-ādam se

vo qatra ho ke samundar dikhā.ī detā hai

vo aadmī hai baḌā ho nazar baḌī jis kī

himālya use kankar dikhā.ī detā hai

'ajab nahīñ ki ho koī chhupā huā rahzan

jo rakh rakhāo se rahbar dikhā.ī detā hai

jo khīñchtā hai lakīreñ faqat lakīroñ par

vo ik faqīr se bad-tar dikhā.ī detā hai

dikhā ke aas mujhe ghar kī tum kahāñ laa.e

yahāñ to har koī be-ghar dikhā.ī detā hai

jo ġham-gusār hai is daur meñ bhī logoñ kā

vo shaḳhs koī payambar dikhā.ī detā hai

jo dekhnā ho to dekho pahāḌ par chaḌh kar

har ik makān kā manzar dikhā.ī detā hai

kabhī mile the vo bargad tale magar ab tak

nazar nazar vahī manzar dikhā.ī detā hai

bahut baḌā nazar aayā thā kal jo ham ko 'adīl'

vo aaj ham se bhī kamtar dikhā.ī detā hai

'ajib shahr ka manzar dikhai deta hai

har ek hath mein KHanjar dikhai deta hai

teri gali mein jo aksar dikhai deta hai

kuchh us ke panw mein chakkar dikhai deta hai

wo ashk jis ka tasalsul hai chashm-e-adam se

wo qatra ho ke samundar dikhai deta hai

wo aadmi hai baDa ho nazar baDi jis ki

himalya use kankar dikhai deta hai

'ajab nahin ki ho koi chhupa hua rahzan

jo rakh rakhao se rahbar dikhai deta hai

jo khinchta hai lakiren faqat lakiron par

wo ek faqir se bad-tar dikhai deta hai

dikha ke aas mujhe ghar ki tum kahan lae

yahan to har koi be-ghar dikhai deta hai

jo gham-gusar hai is daur mein bhi logon ka

wo shaKHs koi payambar dikhai deta hai

jo dekhna ho to dekho pahaD par chaDh kar

har ek makan ka manzar dikhai deta hai

kabhi mile the wo bargad tale magar ab tak

nazar nazar wahi manzar dikhai deta hai

bahut baDa nazar aaya tha kal jo hum ko 'adil'

wo aaj hum se bhi kamtar dikhai deta hai