ajab hai duniya ki be-hisi bhi ki ruh zaKHmon mein baT rahi hai

'ajab hai duniyā kī be-hisī bhī ki ruuh zaḳhmoñ meñ baT rahī hai

kisī ke lahje kī kaaT dekho ki jaise shah-rag hī kaT rahī hai

hazār bāteñ banā rahe haiñ jo merī hālat se be-ḳhabar haiñ

ye ḳhalq-e-shahr-e-sitam-shi'ārāñ ab apnī had se ulaT rahī hai

vo jis ke saa.e meñ baiTh kar ham kabhī sukūn-e-jahāñ batāte

vo merī himmat kī chhāñv ab to mire hī sar se simaT rahī hai

kisī kī hamdardiyoñ ke pīchhe chhupī hai ik maslahat kī duniyā

vo saañp ban kar tamām talḳhī hamāre tan se lipaT rahī hai

na pūchh mujh se mirī kahānī ki jis kā koī sirā nahīñ hai

hayāt merī tumhāre ġham meñ bas ek sadme meñ kaT rahī hai

tumhāre lahje kī vo miThāseñ kisī kā ab to nasīb hoñgī

magar mirī ruuh kī zamīñ ab tumhārī ḳhushbū se phaT rahī hai

mirī udāsī ke pīchhe dekho hazār chehre chhupe hue haiñ

ye mere dukh kī purānī 'ādat ab ek tasbīh raT rahī hai

maiñ hañs ke miltā huuñ sab se lekin ye merā andar hī jāntā hai

ye ruuh 'sāhil' tire alam meñ hazār hissoñ meñ baT rahī hai

'ajab hai duniya ki be-hisi bhi ki ruh zaKHmon mein baT rahi hai

kisi ke lahje ki kaT dekho ki jaise shah-rag hi kaT rahi hai

hazar baaten bana rahe hain jo meri haalat se be-KHabar hain

ye KHalq-e-shahr-e-sitam-shi'aran ab apni had se ulaT rahi hai

wo jis ke sae mein baiTh kar hum kabhi sukun-e-jahan batate

wo meri himmat ki chhanw ab to mere hi sar se simaT rahi hai

kisi ki hamdardiyon ke pichhe chhupi hai ek maslahat ki duniya

wo sanp ban kar tamam talKHi hamare tan se lipaT rahi hai

na puchh mujh se meri kahani ki jis ka koi sira nahin hai

hayat meri tumhaare gham mein bas ek sadme mein kaT rahi hai

tumhaare lahje ki wo miThasen kisi ka ab to nasib hongi

magar meri ruh ki zamin ab tumhaari KHushbu se phaT rahi hai

meri udasi ke pichhe dekho hazar chehre chhupe hue hain

ye mere dukh ki purani 'adat ab ek tasbih raT rahi hai

main hans ke milta hun sab se lekin ye mera andar hi jaanta hai

ye ruh 'sahil' tere alam mein hazar hisson mein baT rahi hai