aib apne kabhi tanhai mein sare ginna

'aib apne kabhī tanhā.ī meñ saare ginnā

phir bilā-ḳhauf gunāhoñ ko hamāre ginnā

vo jo karte haiñ bahut narm mulā.em bāteñ

un ke lahje meñ chhupe lafzī sharāre ginnā

kis ko hamdard kahūñ kis ko kahūñ maiñ apnā

maiñ ne sīkhā hī nahīñ jhūTe sahāre ginnā

ham pe ilzām lagānā to bahut hai āsāñ

ḳhuun dastānoñ pe kitne haiñ tumhāre ginnā

ham ko parkho na faqat lafz ke mīzānoñ se

kitne poshīda ġhazal meñ haiñ ishāre ginnā

muskurānā to ba-zāhir mirī 'ādat hai magar

aañkh se girte hue aaj sitāre ginnā

ham ko bas apne makānoñ kī chhatoñ kā hai ḳhayāl

kyā ġharaz shāhī 'imārat ke manāre ginnā

ai 'habīb' ab to talātum meñ sañbhālo kashtī

phir kabhī shauq se tum lahroñ ke dhāre ginnā

'aib apne kabhi tanhai mein sare ginna

phir bila-KHauf gunahon ko hamare ginna

wo jo karte hain bahut narm mulaem baaten

un ke lahje mein chhupe lafzi sharare ginna

kis ko hamdard kahun kis ko kahun main apna

main ne sikha hi nahin jhuTe sahaare ginna

hum pe ilzam lagana to bahut hai aasan

KHun dastanon pe kitne hain tumhaare ginna

hum ko parkho na faqat lafz ke mizanon se

kitne poshida ghazal mein hain ishaare ginna

muskurana to ba-zahir meri 'adat hai magar

aankh se girte hue aaj sitare ginna

hum ko bas apne makanon ki chhaton ka hai KHayal

kya gharaz shahi 'imarat ke manare ginna

ai 'habib' ab to talatum mein sanbhaalo kashti

phir kabhi shauq se tum lahron ke dhaare ginna