qarye kuche baam dariche jhankte chehre dil mein

qarye kūche baam darīche jhāñkte chehre dil meñ

guzre samoñ ke sab hangāme sab sannāTe dil meñ

ek nazar dekho to sahī ye kaalī sard guphā bhī

faanī vaqt ne kyā lā-fānī naqsh ubhāre dil meñ

lamha-e-qurb ki sā'at-e-furqat apnā ek hī 'ālam

lab nā-vāqif-e-harf-e-tamannā laakh taqāze dil meñ

ik ik nā-āsūda ḳhvāhish ek lapaktā sho'la

nā-āsūda ārzuoñ kā dozaḳh apne dil meñ

apne vujūd se bāhar ḳhair-o-shar kā vujūd nahīñ hai

jazboñ kī āvezish koī jhāñk ke dekhe dil meñ

bujhtī shaam ke surḳh samundar meñ phir sūraj Duubā

phir phaile sochoñ ke sunahre sāñvle saa.e dil meñ

dil vo dasht 'bashīr' ki duur se dekho to ik dariyā

paas aao to har sū pyāsī ret ke Tiile dil meñ

qarye kuche baam dariche jhankte chehre dil mein

guzre samon ke sab hangame sab sannaTe dil mein

ek nazar dekho to sahi ye kali sard gupha bhi

fani waqt ne kya la-fani naqsh ubhaare dil mein

lamha-e-qurb ki sa'at-e-furqat apna ek hi 'alam

lab na-waqif-e-harf-e-tamanna lakh taqaze dil mein

ek ek na-asuda KHwahish ek lapakta sho'la

na-asuda aarzuon ka dozaKH apne dil mein

apne wujud se bahar KHair-o-shar ka wujud nahin hai

jazbon ki aawezish koi jhank ke dekhe dil mein

bujhti sham ke surKH samundar mein phir suraj Duba

phir phaile sochon ke sunahre sanwle sae dil mein

dil wo dasht 'bashir' ki dur se dekho to ek dariya

pas aao to har su pyasi ret ke Tile dil mein