main jis qadar hun aaj tere aastan se dur

maiñ jis qadar huuñ aaj tire āstāñ se duur

shāyad zamīñ bhī utnī na ho āsmāñ se duur

aise bhī hoñge jin ko tirā qurb hai nasīb

ik ham ki tujh se duur tire āstāñ se duur

itnā qarīb vo ki rag-e-jāñ se bhī qarīb

yā duur is qadar ki ḳhayāl-o-gumāñ se duur

ab jā.ūñ bhī to jā.ūñ kidhar maiñ shikasta-dil

ghar bhī yahāñ se duur vo dar bhī yahāñ se duur

maqsūm jab ho jalnā to phir farq kuchh nahīñ

aag apne āshiyāñ meñ ho yā āshiyāñ se duur

kaisī ruteñ guzārīñ ki ye bhī nahīñ khulā

ham duur haiñ bahār se yā haiñ ḳhizāñ se duur

haiñ zauq-e-bandagī meñ kahāñ tak latāfateñ

dekhūñ to sajde karke tire āstāñ se duur

'iqbāl' dil 'ajab hai tamannāoñ kā dayār

itne diye makāñ meñ ujālā makāñ se duur

main jis qadar hun aaj tere aastan se dur

shayad zamin bhi utni na ho aasman se dur

aise bhi honge jin ko tera qurb hai nasib

ek hum ki tujh se dur tere aastan se dur

itna qarib wo ki rag-e-jaan se bhi qarib

ya dur is qadar ki KHayal-o-guman se dur

ab jaun bhi to jaun kidhar main shikasta-dil

ghar bhi yahan se dur wo dar bhi yahan se dur

maqsum jab ho jalna to phir farq kuchh nahin

aag apne aashiyan mein ho ya aashiyan se dur

kaisi ruten guzarin ki ye bhi nahin khula

hum dur hain bahaar se ya hain KHizan se dur

hain zauq-e-bandagi mein kahan tak latafaten

dekhun to sajde karke tere aastan se dur

'iqbaal' dil 'ajab hai tamannaon ka dayar

itne diye makan mein ujala makan se dur