tamam umr ki aawargi pe bhaari hai

tamām umr kī āvārgī pe bhārī hai

vo ek shab jo tirī yaad meñ guzārī hai

sunā rahā huuñ baḌī sādgī se pyaar ke giit

magar yahāñ to ibādat bhī kārobārī hai

nigāh-e-shauq ne mujh ko ye raaz samjhāyā

hayā bhī dil kī nazākat pe zarb-e-kārī hai

mujhe ye zo.am ki maiñ husn kā musavvir huuñ

unheñ ye naaz ki tasvīr to hamārī hai

ye kis ne chheḌ diyā ruḳhsat-e-bahār kā giit

abhī to raqs-e-nasīm-e-bahār jaarī hai

ḳhafā na ho to dikhā deñ ham aa.ina tum ko

hameñ qubūl ki saarī ḳhatā hamārī hai

jahāñ-panāh-e-mohabbat janāb 'shabnam' haiñ

zabān-e-sher meñ farmān-e-shauq jaarī hai

tamam umr ki aawargi pe bhaari hai

wo ek shab jo teri yaad mein guzari hai

suna raha hun baDi sadgi se pyar ke git

magar yahan to ibaadat bhi karobari hai

nigah-e-shauq ne mujh ko ye raaz samjhaya

haya bhi dil ki nazakat pe zarb-e-kari hai

mujhe ye zoam ki main husn ka musawwir hun

unhen ye naz ki taswir to hamari hai

ye kis ne chheD diya ruKHsat-e-bahaar ka git

abhi to raqs-e-nasim-e-bahaar jari hai

KHafa na ho to dikha den hum aaina tum ko

hamein qubul ki sari KHata hamari hai

jahan-panah-e-mohabbat janab 'shabnam' hain

zaban-e-sher mein farman-e-shauq jari hai