ye jiwan hai soch samajh kar jiwan-sathi chuniyega

ye jīvan hai soch samajh kar jīvan-sāthī chuniyegā

chuuk huī to marte dam tak kuḌhiyegā sar dhuniyegā

ek zarā sī kotāhī se bhārī tabāhī aa.egī

'ishq balā hai gahrī nazar se tāne-bāne buniyegā

she'r-o-suḳhan meñ apnī alag pahchān banānā behtar hai

varna hamesha buġhz-o-hasad kī aag maiñ jaliye bhuniyegā

dasht-e-suḳhan meñ andesha hai nau-vārid ke bhaTakne kā

pahle kisī ustād kī nigrānī meñ paḌhiye guniyegā

yaar munāfiq ho jaa.eñ to qat'-e-ta'alluq lāzim hai

varna lakḌī kī mānind andar hī andar ghuniyegā

ham na rahe to bazm-e-suḳhan kī raunaq bhī chhin jā.egī

'mīr' ke is andāz kī ġhazleñ phir na kisī se suniyegā

ek 'sahar' hī kyā hai saarī duniyā aap pe martī hai

kuchh to kahiye kis kis ko dīvār-e-‘ishq meñ chuniyegā

ye jiwan hai soch samajh kar jiwan-sathi chuniyega

chuk hui to marte dam tak kuDhiyega sar dhuniyega

ek zara si kotahi se bhaari tabahi aaegi

'ishq bala hai gahri nazar se tane-bane buniyega

she'r-o-suKHan mein apni alag pahchan banana behtar hai

warna hamesha bughz-o-hasad ki aag main jaliye bhuniyega

dasht-e-suKHan mein andesha hai nau-warid ke bhaTakne ka

pahle kisi ustad ki nigrani mein paDhiye guniyega

yar munafiq ho jaen to qat'-e-ta'alluq lazim hai

warna lakDi ki manind andar hi andar ghuniyega

hum na rahe to bazm-e-suKHan ki raunaq bhi chhin jaegi

'mir' ke is andaz ki ghazlen phir na kisi se suniyega

ek 'sahar' hi kya hai sari duniya aap pe marti hai

kuchh to kahiye kis kis ko diwar-e-‘ishq mein chuniyega