jab tak tu na aaya nazar aai nahin duniya

jab tak tū na aayā nazar aa.ī nahīñ duniyā

mujh ko mirī āñkhoñ ne dikhā.ī nahīñ duniyā

ye mere buzurgoñ ko virāsat meñ milī hai

ye mere buzurgoñ ne kamā.ī nahīñ duniyā

baazū se pakaḌ kar mujhe kal rok liyā thā

phir maiñ ne bhī raste se haTā.ī nahīñ duniyā

bāñhoñ ke shikanje meñ jakaḌ kar ise rakkho

mā'shūq kī nāzuk sī kalā.ī nahīñ duniyā

bahte hue paanī kā har ik rang hai is meñ

Thahre hue paanī pe to kaa.ī nahīñ duniyā

duniyā ne ragedā hai mujhe jab bhī ragedā

mere kabhī changul meñ to aa.ī nahīñ duniyā

duniyā kī koī kal mujhe sīdhī nahīñ lagtī

insān ke hāthoñ ne banā.ī nahīñ duniyā

kal tak maiñ samajhtā thā ye duniyā hai koī chiiz

ab tak mirī muTThī meñ to aa.ī nahīñ duniyā

khāne kā namak ḳhud hī kamānā paḌā mujh ko

roTī se lagā kar kabhī khaa.ī nahīñ duniyā

dastak to huī hai mire darvāze pe aksar

lekin mire andar kabhī aa.ī nahīñ duniyā

jab tak tu na aaya nazar aai nahin duniya

mujh ko meri aankhon ne dikhai nahin duniya

ye mere buzurgon ko wirasat mein mili hai

ye mere buzurgon ne kamai nahin duniya

bazu se pakaD kar mujhe kal rok liya tha

phir main ne bhi raste se haTai nahin duniya

banhon ke shikanje mein jakaD kar ise rakkho

ma'shuq ki nazuk si kalai nahin duniya

bahte hue pani ka har ek rang hai is mein

Thahre hue pani pe to kai nahin duniya

duniya ne rageda hai mujhe jab bhi rageda

mere kabhi changul mein to aai nahin duniya

duniya ki koi kal mujhe sidhi nahin lagti

insan ke hathon ne banai nahin duniya

kal tak main samajhta tha ye duniya hai koi chiz

ab tak meri muTThi mein to aai nahin duniya

khane ka namak KHud hi kamana paDa mujh ko

roTi se laga kar kabhi khai nahin duniya

dastak to hui hai mere darwaze pe aksar

lekin mere andar kabhi aai nahin duniya