isi liye to safar muKHtasar nahin hote

isī liye to safar muḳhtasar nahīñ hote

ham aise ḳhāna-ba-doshoñ ke ghar nahīñ hote

tamām 'umr vo chahkār ko taraste haiñ

jin 'ālīshān gharoñ meñ shajar nahīñ hote

na.ī dalīl do is baar jītne ke liye

purāne harbe sadā kārgar nahīñ hote

hameñ ḳhayāl kahāñ aatā zor-e-bāzū kā

hamāre naale agar be-asar nahīñ hote

maiñ ziist se unheñ minhā shumār kartā huuñ

tumhāre saath jo lamhe basar nahīñ hote

jahāñ jahāñ bhī zarūrī ho un kā honā vahīñ

mire rafīq mire chārāgar nahīñ hote

havā ke haath pe bai'at kā sochne lage haiñ

kuchh is liye bhī diye baam par nahīñ hote

bahut sī nisbateñ hotī haiñ sharm kā bā'is

havāle saare kabhī mo'tabar nahīñ hote

kabhī kabhī jinheñ ham apnā maan lete haiñ

dikhā.ī dete haiñ apne magar nahīñ hote

jo bachpane hī meñ jazboñ ko Thes lag jaa.e

to marne lagte haiñ phir jān-bar nahīñ hote

muqāble ke liye saaf ḳhuun lāzim hai

munāfiqīn to sīna-sipar nahīñ hote

janāb chāhne vāloñ se duur hote nahīñ

jo ho bhī jaa.eñ agar is qadar nahīñ hote

dikhā.ī denā kahāñ hotā hai 'umuq-nazarī

jo dekh sakte haiñ sab dīda-var nahīñ hote

isi liye to safar muKHtasar nahin hote

hum aise KHana-ba-doshon ke ghar nahin hote

tamam 'umr wo chahkar ko taraste hain

jin 'alishan gharon mein shajar nahin hote

nai dalil do is bar jitne ke liye

purane harbe sada kargar nahin hote

hamein KHayal kahan aata zor-e-bazu ka

hamare nale agar be-asar nahin hote

main zist se unhen minha shumar karta hun

tumhaare sath jo lamhe basar nahin hote

jahan jahan bhi zaruri ho un ka hona wahin

mere rafiq mere chaaragar nahin hote

hawa ke hath pe bai'at ka sochne lage hain

kuchh is liye bhi diye baam par nahin hote

bahut si nisbaten hoti hain sharm ka ba'is

hawale sare kabhi mo'tabar nahin hote

kabhi kabhi jinhen hum apna man lete hain

dikhai dete hain apne magar nahin hote

jo bachpane hi mein jazbon ko Thes lag jae

to marne lagte hain phir jaan-bar nahin hote

muqable ke liye saf KHun lazim hai

munafiqin to sina-sipar nahin hote

janab chahne walon se dur hote nahin

jo ho bhi jaen agar is qadar nahin hote

dikhai dena kahan hota hai 'umuq-nazari

jo dekh sakte hain sab dida-war nahin hote