ek na ek din juda hi hota hai

ik na ik din judā hī hotā hai

be-vafā be-vafā hī hotā hai

maiñ huuñ pahlā use batā denā

dūsrā dūsrā hī hotā hai

'ishq meñ ḳhud koī nahīñ paḌtā

har koī mubtalā hī hotā hai

qāfile kī yahī haqīqat hai

rāhzan rahnumā hī hotā hai

maslahat kā chalan hai har jānib

har sitam ab ravā hī hotā hai

muflisī faḳhr ho nahīñ saktī

tauq-e-ġhurbat sazā hī hotā hai

'ishq kā koī hal nahīñ hotā

ye maraz lā-davā hī hotā hai

chāhe baT jaa.e yā palaT jaa.e

rāsta rāsta hī hotā hai

ye mohabbat bhī kyā musībat hai

jis ko chāho ḳhafā hī hotā hai

jis ko hāsil ho qurbat-e-jānāñ

us kā har din nayā hī hotā hai

zindagī kā koī bharosa kyā

hādsa hādsa hī hotā hai

tum udāsī kahāñ chhupāoge

aa.ina aa.ina hī hotā hai

dil meñ jis ko bhī rakh liyā jaa.e

dil meñ āḳhir ḳhudā hī hotā hai

ek na ek din juda hi hota hai

be-wafa be-wafa hi hota hai

main hun pahla use bata dena

dusra dusra hi hota hai

'ishq mein KHud koi nahin paDta

har koi mubtala hi hota hai

qafile ki yahi haqiqat hai

rahzan rahnuma hi hota hai

maslahat ka chalan hai har jaanib

har sitam ab rawa hi hota hai

muflisi faKHr ho nahin sakti

tauq-e-ghurbat saza hi hota hai

'ishq ka koi hal nahin hota

ye maraz la-dawa hi hota hai

chahe baT jae ya palaT jae

rasta rasta hi hota hai

ye mohabbat bhi kya musibat hai

jis ko chaho KHafa hi hota hai

jis ko hasil ho qurbat-e-jaanan

us ka har din naya hi hota hai

zindagi ka koi bharosa kya

hadsa hadsa hi hota hai

tum udasi kahan chhupaoge

aaina aaina hi hota hai

dil mein jis ko bhi rakh liya jae

dil mein aaKHir KHuda hi hota hai