bas ek jaan hi baqi hai jaan mat lena

bas ek jaan hī baaqī hai jaan mat lenā

hamāre sabr kā tum imtihān mat lenā

sabhī ke sāmne ham ko bharī 'adālat meñ

hameñ bulā ke hamārā bayān mat lenā

ye log shahr ke dehātiyoñ se zālim haiñ

so apne gaañv se hijrat kī Thaan mat lenā

falak zamīn pe tum ko paTaḳh ke pheñkegā

tum āsmān se ūñchī uḌaan mat lenā

vahāñ se baa'd meñ mumkin hai ko.elā nikle

mile jo muft bhī hiire kī kaan mat lenā

udhār maañg ke vāpas koī nahīñ kartā

hamāre shahr meñ koī dukān mat lenā

vafā nibhātā nahīñ koī 'umr bhar 'faisal'

kisī se 'ahd kisī se zabān mat lenā

bas ek jaan hi baqi hai jaan mat lena

hamare sabr ka tum imtihan mat lena

sabhi ke samne hum ko bhari 'adalat mein

hamein bula ke hamara bayan mat lena

ye log shahr ke dehatiyon se zalim hain

so apne ganw se hijrat ki Than mat lena

falak zamin pe tum ko paTaKH ke phenkega

tum aasman se unchi uDan mat lena

wahan se ba'd mein mumkin hai koela nikle

mile jo muft bhi hire ki kan mat lena

udhaar mang ke wapas koi nahin karta

hamare shahr mein koi dukan mat lena

wafa nibhata nahin koi 'umr bhar 'faisal'

kisi se 'ahd kisi se zaban mat lena