baDe baDe kai izzat-maab dekhe hain

baḌe baḌe ka.ī 'izzat-ma.āb dekhe haiñ

zamīñ pe chalte hue āftāb dekhe haiñ

fareb-o-makr ke Daale rahe jo chehroñ par

utarte ham ne unhīñ ke naqāb dekhe haiñ

rah-e-safar meñ vo thak jā.eñge bhalā kaise

jinhoñ ne manzileñ paane ke ḳhvāb dekhe haiñ

kisī ke daam meñ aanā to ab nahīñ mumkin

sarāb ham ne baḌe be-hisāb dekhe haiñ

rahī haiñ kāvisheñ jin kī junūn kī had tak

hamesha log vahī kāmyāb dekhe haiñ

to kyā huā jo haiñ safhāt aaj nafrat ke

hazāroñ ham ne mohabbat ke baab dekhe haiñ

har ek baar mile zaḳhm ham ko ḳhāroñ se

chaman meñ jab bhī shagufta-gulāb dekhe haiñ

yaqīn hai mujhe 'irshād' vaqt badlegā

ki is zamīñ ne baḌe inqilāb dekhe haiñ

baDe baDe kai 'izzat-maab dekhe hain

zamin pe chalte hue aaftab dekhe hain

fareb-o-makr ke Dale rahe jo chehron par

utarte hum ne unhin ke naqab dekhe hain

rah-e-safar mein wo thak jaenge bhala kaise

jinhon ne manzilen pane ke KHwab dekhe hain

kisi ke dam mein aana to ab nahin mumkin

sarab hum ne baDe be-hisab dekhe hain

rahi hain kawishen jin ki junun ki had tak

hamesha log wahi kaamyab dekhe hain

to kya hua jo hain safhat aaj nafrat ke

hazaron hum ne mohabbat ke bab dekhe hain

har ek bar mile zaKHm hum ko KHaron se

chaman mein jab bhi shagufta-gulab dekhe hain

yaqin hai mujhe 'irshad' waqt badlega

ki is zamin ne baDe inqilab dekhe hain