ab nahin hath jinhen tham ke chalna sikhen

ab nahīñ haath jinheñ thaam ke chalnā sīkheñ

naaz ke paale hue aap hī palnā sīkheñ

ham ne kuchh garmī-e-sahrā se guzārish nahīñ kī

apne pairoñ se kahā ret pe chalnā sīkheñ

itnī fursat hī kahāñ degī ye sar-garmī-e-shauq

kis liye ham kaf-e-afsos ko malnā sīkheñ

dair-o-kā'ba ke vo ahvāl badalne vaale

jo nahīñ kahte the hālāt meñ Dhalnā sīkheñ

be-sabab uḌte bagūloñ ke liye behtar hai

shaukat-e-gul se zarā phūlnā phalnā sīkheñ

mere fan ko baḌā pechīda batāne vaale

roz-marra ke masā.il se nikalnā sīkheñ

rāsta is liye dushvār chunā hai mah-nūr

merī ḳhvāhish hai mire log sañbhalnā sīkheñ

ab nahin hath jinhen tham ke chalna sikhen

naz ke pale hue aap hi palna sikhen

hum ne kuchh garmi-e-sahra se guzarish nahin ki

apne pairon se kaha ret pe chalna sikhen

itni fursat hi kahan degi ye sar-garmi-e-shauq

kis liye hum kaf-e-afsos ko malna sikhen

dair-o-ka'ba ke wo ahwal badalne wale

jo nahin kahte the haalat mein Dhalna sikhen

be-sabab uDte bagulon ke liye behtar hai

shaukat-e-gul se zara phulna phalna sikhen

mere fan ko baDa pechida batane wale

roz-marra ke masail se nikalna sikhen

rasta is liye dushwar chuna hai mah-nur

meri KHwahish hai mere log sanbhalna sikhen