ab apne haal-e-dil pe na kyun aab-dida hun

ab apne hāl-e-dil pe na kyuuñ āb-dīda huuñ

duniyā bhī māntī hai ki āfat-rasīda huuñ

hairat hī is meñ kyā hai agar sar-kashīda huuñ

āḳhir ġhurūr-e-zīst kā maiñ āfrīda huuñ

dāman-darīda huuñ na garebāñ-darīda huuñ

vahshat to ye hai maiñ suḳhan-e-nā-shunīda huuñ

merī jabīñ pe sabt haiñ duniyā kī kulfateñ

maiñ sharh-e-rozgār kā vāhid jarīda huuñ

ye pūchhnā hai aaj zarūrat ke jabr se

kis kis kā aur dahr meñ minnat-kashīda huuñ

uThtī hai hook dil meñ ki phūloñ meñ jā basūñ

shāyad kisī hasīñ kā ḳhayāl-e-ramīda huuñ

ai āb-o-rang-e-bāġh mujhe ajnabī na jaan

maiñ sābiqa bahār kī bū-e-parīda huuñ

ai ābrū-e-zīst na mujh se gurez kar

lauh-e-jahāñ pe zulmat-e-ġham kā qasīda huuñ

tujh ko bhī kyā kisī se 'aqīdat rahī kabhī

ai shaḳhs maiñ to sirf 'aqīdat-gazīda huuñ

auroñ ke ġham meñ khaa.ī haiñ dar dar kī Thokareñ

ai ziist ehtirām ki maiñ barguzīda huuñ

maiñ bhī fareb-e-dahr se 'nūrī' na bach sakā

hālāñki sard-o-garm-e-zamāna-chashīda huuñ

ab apne haal-e-dil pe na kyun aab-dida hun

duniya bhi manti hai ki aafat-rasida hun

hairat hi is mein kya hai agar sar-kashida hun

aaKHir ghurur-e-zist ka main aafrida hun

daman-darida hun na gareban-darida hun

wahshat to ye hai main suKHan-e-na-shunida hun

meri jabin pe sabt hain duniya ki kulfaten

main sharh-e-rozgar ka wahid jarida hun

ye puchhna hai aaj zarurat ke jabr se

kis kis ka aur dahr mein minnat-kashida hun

uThti hai hook dil mein ki phulon mein ja basun

shayad kisi hasin ka KHayal-e-ramida hun

ai aab-o-rang-e-bagh mujhe ajnabi na jaan

main sabiqa bahaar ki bu-e-parida hun

ai aabru-e-zist na mujh se gurez kar

lauh-e-jahan pe zulmat-e-gham ka qasida hun

tujh ko bhi kya kisi se 'aqidat rahi kabhi

ai shaKHs main to sirf 'aqidat-gazida hun

auron ke gham mein khai hain dar dar ki Thokaren

ai zist ehtiram ki main barguzida hun

main bhi fareb-e-dahr se 'nuri' na bach saka

haalanki sard-o-garm-e-zamana-chashida hun