sun to sahi jahan mein hai tera fasana kya

sun to sahī jahāñ meñ hai terā fasāna kyā

kahtī hai tujh ko ḳhalq-e-ḳhudā ġhā.ebāna kyā

kyā kyā ulajhtā hai tirī zulfoñ ke taar se

baḳhiya-talab hai sīna-e-sad-chāk shāna kyā

zer-e-zamīñ se aatā hai jo gul so zar-ba-kaf

qārūñ ne rāste meñ luTāyā ḳhazāna kyā

uḌtā hai shauq-e-rāhat-e-manzil se asp-e-umr

mahmez kahte haiñge kise tāziyāna kyā

ziina sabā kā DhūñDtī hai apnī musht-e-ḳhāk

bām-e-buland yaar kā hai āstāna kyā

chāroñ taraf se sūrat-e-jānāñ ho jalva-gar

dil saaf ho tirā to hai ā.īna-ḳhāna kyā

sayyād asīr-e-dām-e-rag-e-gul hai andalīb

dikhlā rahā hai chhup ke use dām-o-dāna kyā

tabl-o-alam hī paas hai apne na mulk o maal

ham se ḳhilāf ho ke karegā zamāna kyā

aatī hai kis tarah se mire qabz-e-rūh ko

dekhūñ to maut DhūñD rahī hai bahāna kyā

hotā hai zard sun ke jo nāmard mudda.ī

rustam kī dāstāñ hai hamārā fasāna kyā

tirchhī nigah se tā.ir-e-dil ho chukā shikār

jab tiir kaj paḌe to uḌegā nishāna kyā

sayyād-e-gul-ezār dikhātā hai sair-e-bāġh

bulbul qafas meñ yaad kare āshiyāna kyā

betāb hai kamāl hamārā dil-e-hazīñ

mehmāñ sarā-e-jism kā hogā ravāna kyā

yuuñ mudda.ī hasad se na de daad to na de

'ātish' ġhazal ye tū ne kahī āshiqāna kyā

sun to sahi jahan mein hai tera fasana kya

kahti hai tujh ko KHalq-e-KHuda ghaebana kya

kya kya ulajhta hai teri zulfon ke tar se

baKHiya-talab hai sina-e-sad-chaak shana kya

zer-e-zamin se aata hai jo gul so zar-ba-kaf

qarun ne raste mein luTaya KHazana kya

uDta hai shauq-e-rahat-e-manzil se asp-e-umr

mahmez kahte hainge kise taziyana kya

zina saba ka DhunDti hai apni musht-e-KHak

baam-e-buland yar ka hai aastana kya

chaaron taraf se surat-e-jaanan ho jalwa-gar

dil saf ho tera to hai aaina-KHana kya

sayyaad asir-e-dam-e-rag-e-gul hai andalib

dikhla raha hai chhup ke use dam-o-dana kya

tabl-o-alam hi pas hai apne na mulk o mal

hum se KHilaf ho ke karega zamana kya

aati hai kis tarah se mere qabz-e-ruh ko

dekhun to maut DhunD rahi hai bahana kya

hota hai zard sun ke jo namard muddai

rustam ki dastan hai hamara fasana kya

tirchhi nigah se tair-e-dil ho chuka shikar

jab tir kaj paDe to uDega nishana kya

sayyaad-e-gul-ezar dikhata hai sair-e-bagh

bulbul qafas mein yaad kare aashiyana kya

betab hai kamal hamara dil-e-hazin

mehman sara-e-jism ka hoga rawana kya

yun muddai hasad se na de dad to na de

'atish' ghazal ye tu ne kahi aashiqana kya