wo aks mauja-e-gul tha chaman chaman mein raha

vo 'aks mauja-e-gul thā chaman chaman meñ rahā

vo rang rang meñ utrā kiran kiran meñ rahā

vo naam hāsil-e-fan ho ke mere fan meñ rahā

ki ruuh ban ke mirī soch ke badan meñ rahā

sukūn-e-dil ke liye ham kahāñ kahāñ na gaye

magar ye dil ki sadā us kī anjuman meñ rahā

vo shahr vāloñ ke aage kahīñ mohazzab thā

vo ek shaḳhs jo shahroñ se duur ban meñ rahā

batā gayā hai mujhe kaisī an-kahī bāteñ

vo e'tirāf jo us aañkh kī thakan meñ rahā

charāġh bujhte rahe aur ḳhvāb jalte rahe

'ajīb tarz kā mausam mire vatan meñ rahā

wo 'aks mauja-e-gul tha chaman chaman mein raha

wo rang rang mein utra kiran kiran mein raha

wo nam hasil-e-fan ho ke mere fan mein raha

ki ruh ban ke meri soch ke badan mein raha

sukun-e-dil ke liye hum kahan kahan na gaye

magar ye dil ki sada us ki anjuman mein raha

wo shahr walon ke aage kahin mohazzab tha

wo ek shaKHs jo shahron se dur ban mein raha

bata gaya hai mujhe kaisi an-kahi baaten

wo e'tiraf jo us aankh ki thakan mein raha

charagh bujhte rahe aur KHwab jalte rahe

'ajib tarz ka mausam mere watan mein raha