qurs-e-KHur ko dekh kar taskin rakh ai mehman-e-subh

qurs-e-ḳhur ko dekh kar taskīñ rakh ai mehmān-e-sub.h

tā-dahān-e-shām pahuñchātā hai rāziq nān-e-sub.h

ma.anī-e-raushan jo hoñ to sau se behtar ek sher

matl.a-e-ḳhurshīd kaafī hai pa.e-dīvān-e-sub.h

sair-chashmī diid ke bhūkoñ kī dekho kahtī hai

mah panīr-e-shām hai ḳhurshīd-e-tābāñ nān-e-sub.h

sadqe us parvardigār-e-pāk ke jis ne kiyā

bahr-e-tifl-e-ġhuncha paidā shīr-e-be-pistān-e-sub.h

sub.h-dam ġhā.eb hue 'anjum' to sābit ho gayā

ḳhanda-e-behūda par toḌe ga.e dandān-e-sub.h

vasl kī shab aañkh dikhlā kar ye anjum kahte haiñ

lo qayāmat aa.ī mashriq se uThā tūfān-e-sub.h

dekhe vo gulshan jo din-do-din rahe yaañ misl-e-gul

ham to shabnam-sāñ 'nasīm' ek dam ke haiñ mehmān-e-sub.h

qurs-e-KHur ko dekh kar taskin rakh ai mehman-e-subh

ta-dahan-e-sham pahunchata hai raaziq nan-e-subh

mani-e-raushan jo hon to sau se behtar ek sher

matla-e-KHurshid kafi hai pae-diwan-e-subh

sair-chashmi did ke bhukon ki dekho kahti hai

mah panir-e-sham hai KHurshid-e-taban nan-e-subh

sadqe us parwardigar-e-pak ke jis ne kiya

bahr-e-tifl-e-ghuncha paida shir-e-be-pistan-e-subh

subh-dam ghaeb hue 'anjum' to sabit ho gaya

KHanda-e-behuda par toDe gae dandan-e-subh

wasl ki shab aankh dikhla kar ye anjum kahte hain

lo qayamat aai mashriq se uTha tufan-e-subh

dekhe wo gulshan jo din-do-din rahe yan misl-e-gul

hum to shabnam-san 'nasim' ek dam ke hain mehman-e-subh