kitna hai gahra waqt ka dhaara kaha na jae

kitnā hai gahrā vaqt kā dhārā kahā na jaa.e

kis ko hai ehtiyāt kā yaarā kahā na jaa.e

kal raat āsmān se TuuTā to thā magar

kis ke nasīb kā thā sitārā kahā na jaa.e

sab kī nazar uThī hai udhar dekhte haiñ sab

kis kī taraf hai us kā ishārā kahā na jaa.e

is tarh se dabī huī yādoñ ko mat kured

ban jaa.e kab ye raakh sharārā kahā na jaa.e

guzrā hai kaisī kaisī aziyyat se sub.h tak

kal raat e'tibār kā maarā kahā na jaa.e

jis kā ḳhayāl TūTte lamhoñ kā hai rafīq

'aiman' kabhī vo hogā hamārā kahā na jaa.e

kitna hai gahra waqt ka dhaara kaha na jae

kis ko hai ehtiyat ka yara kaha na jae

kal raat aasman se TuTa to tha magar

kis ke nasib ka tha sitara kaha na jae

sab ki nazar uThi hai udhar dekhte hain sab

kis ki taraf hai us ka ishaara kaha na jae

is tarh se dabi hui yaadon ko mat kured

ban jae kab ye rakh sharara kaha na jae

guzra hai kaisi kaisi aziyyat se subh tak

kal raat e'tibar ka mara kaha na jae

jis ka KHayal TuTte lamhon ka hai rafiq

'aiman' kabhi wo hoga hamara kaha na jae