sozish-e-gham ke siwa kahish-e-furqat ke siwa

sozish-e-ġham ke sivā kāhish-e-furqat ke sivā

ishq meñ kuchh bhī nahīñ dard kī lazzat ke sivā

dil meñ ab kuchh bhī nahīñ un kī mohabbat ke sivā

sab fasāne haiñ haqīqat meñ haqīqat ke sivā

kaun kah saktā hai ye ahl-e-tarīqat ke sivā

saare jhagḌe haiñ jahāñ meñ tirī nisbat ke sivā

kitne chehroñ ne mujhe dāvat-e-jalva baḳhshī

koī sūrat na milī aap kī sūrat ke sivā

ġham-e-uqbā ġham-e-daurāñ ġham-e-hastī kī qasam

aur bhī ġham haiñ zamāne meñ mohabbat ke sivā

bazm-e-jānāñ meñ are zauq-e-farāvāñ ab tak

kuchh bhī hāsil na huā dīda-e-hairat ke sivā

vo shab-e-hijr vo tārīk fazā vo vahshat

koī ġham-ḳhvār na thā dard kī shiddat ke sivā

mohtasib aao chaleñ aaj to mai-ḳhāne meñ

ek jannat hai vahāñ aap kī jannat ke sivā

jo tahī-dast bhī hai aur tahī-dāman bhī

vo kahāñ jā.egā tere dar-e-daulat ke sivā

jis ne qudrat ke har iqdām se Takkar lī hai

vo pashīmāñ na huā jabr-e-mashiyyat ke sivā

mujh se ye pūchh rahe haiñ mire ahbāb 'azīz'

kyā milā shahr-e-suḳhan meñ tumheñ shohrat ke sivā

sozish-e-gham ke siwa kahish-e-furqat ke siwa

ishq mein kuchh bhi nahin dard ki lazzat ke siwa

dil mein ab kuchh bhi nahin un ki mohabbat ke siwa

sab fasane hain haqiqat mein haqiqat ke siwa

kaun kah sakta hai ye ahl-e-tariqat ke siwa

sare jhagDe hain jahan mein teri nisbat ke siwa

kitne chehron ne mujhe dawat-e-jalwa baKHshi

koi surat na mili aap ki surat ke siwa

gham-e-uqba gham-e-dauran gham-e-hasti ki qasam

aur bhi gham hain zamane mein mohabbat ke siwa

bazm-e-jaanan mein are zauq-e-farawan ab tak

kuchh bhi hasil na hua dida-e-hairat ke siwa

wo shab-e-hijr wo tarik faza wo wahshat

koi gham-KHwar na tha dard ki shiddat ke siwa

mohtasib aao chalen aaj to mai-KHane mein

ek jannat hai wahan aap ki jannat ke siwa

jo tahi-dast bhi hai aur tahi-daman bhi

wo kahan jaega tere dar-e-daulat ke siwa

jis ne qudrat ke har iqdam se Takkar li hai

wo pashiman na hua jabr-e-mashiyyat ke siwa

mujh se ye puchh rahe hain mere ahbab 'aziz'

kya mila shahr-e-suKHan mein tumhein shohrat ke siwa