apne hi aap se milne ko taras jaegi
apne hī aap se milne ko taras jā.egī
ruuh jo jism meñ jā.egī to phañs jā.egī
ye ḳhushī abr ke mānind guzar jā.egī
dasht ko chhoḌ samundar pe baras jā.egī
mutma.in aañkh to ho jā.egī ḳhvāboñ se magar
ruuh sachchā.ī ko dekhegī jhulas jā.egī
yaad aa.egī rulā.egī chalī jā.egī
ye aziyyat hai terī ruuh meñ bas jā.egī
lag gayā ḳhuun mirī chashm ke muñh ko yaaro
kis tarah ab mirī āñkhoñ kī havas jā.egī
maiñ sitāroñ se bahut duur nahīñ huuñ so ab
bad-nasībī mire me'yār pe kas jā.egī
apne andar ke samundar kā huuñ tinkā 'sāhil'
jā.ūñgā le ke jidhar mauj-e-nafas jā.egī
apne hi aap se milne ko taras jaegi
ruh jo jism mein jaegi to phans jaegi
ye KHushi abr ke manind guzar jaegi
dasht ko chhoD samundar pe baras jaegi
mutmain aankh to ho jaegi KHwabon se magar
ruh sachchai ko dekhegi jhulas jaegi
yaad aaegi rulaegi chali jaegi
ye aziyyat hai teri ruh mein bas jaegi
lag gaya KHun meri chashm ke munh ko yaro
kis tarah ab meri aankhon ki hawas jaegi
main sitaron se bahut dur nahin hun so ab
bad-nasibi mere me'yar pe kas jaegi
apne andar ke samundar ka hun tinka 'sahil'
jaunga le ke jidhar mauj-e-nafas jaegi
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
