soz-e-gham se kis qadar shikwa-sara hote hain log

soz-e-ġham se kis qadar shikva-sarā hote haiñ log

jal bujheñ aur lab na kholeñ vo bhī kyā hote haiñ log

fasl-e-gul meñ saath haiñ ḳhushbū-e-dāman kī tarah

rut badaltī hai to bas mauj-e-havā hote haiñ log

log kitnā hī chhupā.eñ sūrat-e-hālāt ko

sūrat-e-hālāt kā ḳhud aa.ina hote haiñ log

band kar dete haiñ jo auroñ pe āzādī kī raah

ḳhud vo apne hī liye zanjīr-e-pā hote haiñ log

yuuñ to kahne ko haiñ ahl-e-ġham ke sad.hā ġham-gusār

jin pe ġham guzre vahī ġham-āshnā hote haiñ log

is adā kā kyā Thikāna is ravish kā kyā javāb

baat ranjish kī na ho phir bhī ḳhafā hote haiñ log

kis ko barham kījiye ilzām kis ko dījiye

naam kis kā lījiye sab be-vafā hote haiñ log

ham gunahgāroñ pe ilzām-e-gunah-gārī ba-jā

pārsāoñ meñ bhī kitne pārsā hote haiñ log

ghir ga.e 'iqbāl' tum rangīñ qabāoñ meñ kahāñ

mil ke dekho un se jo sāda-qabā hote haiñ log

soz-e-gham se kis qadar shikwa-sara hote hain log

jal bujhen aur lab na kholen wo bhi kya hote hain log

fasl-e-gul mein sath hain KHushbu-e-daman ki tarah

rut badalti hai to bas mauj-e-hawa hote hain log

log kitna hi chhupaen surat-e-haalat ko

surat-e-haalat ka KHud aaina hote hain log

band kar dete hain jo auron pe aazadi ki rah

KHud wo apne hi liye zanjir-e-pa hote hain log

yun to kahne ko hain ahl-e-gham ke sadha gham-gusar

jin pe gham guzre wahi gham-ashna hote hain log

is ada ka kya Thikana is rawish ka kya jawab

baat ranjish ki na ho phir bhi KHafa hote hain log

kis ko barham kijiye ilzam kis ko dijiye

nam kis ka lijiye sab be-wafa hote hain log

hum gunahgaron pe ilzam-e-gunah-gari ba-ja

parsaon mein bhi kitne parsa hote hain log

ghir gae 'iqbaal' tum rangin qabaon mein kahan

mil ke dekho un se jo sada-qaba hote hain log